Una sentencia que quier ser “castigu exemplar” pal sindicalismu amuesa la falta drechos democráticos que carecen los trabayaores y los Pueblos nel Reinu d’España
El Tribunal Supremu vien de confirmar la sentencia de tres años y mediu de prisión a cauna de Les 6 de La Suiza, xunto una multa de 125.000 €, sólo por participar nuna campaña normal d’aición sindical, entamá pola CNT en defensa d’una trabayaora supuestamente acosá llaboral y sesualmente na antigua Pastelería La Suiza, de Xixón.
Si Les 6 de La Suiza llegaren entrar en prisión, perveríase una custión: dellos grupos de presión económico, policial, xudicial y mediático trabayen apriesa p’afitar el recorte los drechos ciudadanos y sindicales que permite, dende 2015, la conocía comu Llei Mordaza (Llei de Proteición de la Seguranza Ciudadano), y el sosiguiente endurecimientu’l Códigu Penal en materia drechos y llibertaes ciudadanes. Y hai que remembrar que, magar que foi’l PP quien llantó esta contrarreforma llexisllativa, los posteriores gobiernos del PSOE respetáronla y acomodáronse bien a esfrutar del control sociopolíticu que-yos permite. La casta, use les siegles partidaries qu’use, potencia el recorte llibertaes y un control policial descomanáu, comu ferramientes pa moldear un gran rebañu social desmotiváu y adormecíu.
Nun ye nin presentable, nin xusto, nin democrático qu’un Estáu meta’n prisión a presones normales, xente mozo, mas y pas de neños, trabayaores esforciaos, vecinos exemplares… sólo por ser solidaries con otra trabayaora. Lo que se ta castigando equí nun ye’l casu La Suiza. Lo que castiga, con saña y desproporción, ye la solidaridá obrera y los drechos sindicales, dos pegoyos ensin los que ye imposible la esistencia de cualisquier réxime que se pretenda democráticu.
Con esti gravísimu retrocesu queda amosao que l’Estáu español nin respeta nin protex a los trabayaores y a los Pueblos qu’apriesa nes sos llendes. El Reinu d’España sólo puxa, ca vegá más, por recortar los drechos y llibertaes de toos ellos.
Poro, Andecha Astur quier compartir güei cola sociedá asturiano cuatru idegues fundamentales:
- La llibertá ye l’únicu futuru que l’Estáu español debe a Les 6 de La Suiza.
- Los partíos que na Xunta Xeneral d’Asturies y nel Parllamentu español dicen representar a la clas trabayaora tienen de facer del drechu a la llibertá d’estes compañeres un oxetivu prioritariu.
- La sociedá asturiano tien d’organizase xunitariamente pa garantizar que ná tarece la llibertá de Les 6 de La Suiza.
- Ye urxente valtiar el marcu llegal que representa la conocía comu Llei Mordaza, asegurando al empar un nueu Códigu Penal que nun persiga l’exerciciu democráticu de los drechos y llibertaes básicos, ente ellos los sindicales.
Por mor de too ello, Andecha Astur sofita la concentración que güei se va facer na Plaza Mayor de Xixón, a les 19’30 h., pol drechu a la llibertá de Les 6 de La Suiza. Y comprométese a siguir collaborando xunitariamente colos colleutivos sociales y políticos que coinciden na defensa d’estes compañeres.
¡¡¡ 6 DE LA SUIZA, LLIBERTÁ !!!
