El Conseyu Soberanu, y el pueblu asturianu que con tantu enfotu defendió’l país frente les tropes facistes españoles, foron protagonistes d’un sentíu homenaxe onde se perafitó’l compromisu col país y l’apueste pola República Asturiana como opción de futuru
Tres l’ascensu a les trincheres de L’Abidular – Filispardi, nel Puertu Tarna, onde se llantó l’asturina n’homenaxe a les asturianes y asturianos que defendieron el país frente a les tropes franquistes -enxamás nun fueron a pasar pel Puertu Tarna- tuvo llugar l’homenaxe floral énte’l monolitu que nel mesmu puertu, na llende ente Asturies y Llión, recuerda la hestórica declaración de Soberanía, cola que’l Conseyu llibrábase del xugu que suponía la República española, y decidió asumir la defensa de la so independencia y soberanía, fasta les postreres consecuencies.
Na intervención política destacáronse los fechos hestóricos y denuncióse la falsa transición del franquismu a la monarquía borbónica y como nel casu d’Asturies, a diferencia del restu de naciones del Estáu, en cuenta de recuperar la istitución política previa al franquismu que mos representaba, el Conseyu Soberanu, impunxéronmos ensin dexamos votalu, un estatutu y un «Principado» ensin denguna base social, que nun va acullá d’una cenciella descentralización alministrativa.
Ello asina, perafitóse que dende’l proyeutu de recostruición nacional y social qu’Andecha Astur defende, el nuesu apuestu pasa por avanzar haza una República Asturiana que seya garantía de democracia, de respetu a los drechos individuales y colleutivos, y garantía de futuru d’esti país d’homes y muyeres llibres.
