El procesu de masificación turístico que vien careciendo Asturies provoca ente otros munchos problemes la xentrificación, ello ye, el desplazamientu de la población autóctono en beneficiu de pisos turísticos y segundes residencies
La campaña ‘MACILLAVI PA LOS YOSPLA’ – ‘Cimavilla pa los playos´quier denunciar esi procesu, centrándolu nel xixonés barriu de Cimavilla por ser ún exemplu nidiu de lo que ye la xentrificación como consecuencia -ente otres custiones- d’una masificación turístico ensin xacíu, y de l’aplicación de polítiques ayenes a les necesidaes del barriu y los sos vecinos, sinon a esi procesu de xentrificación que denunciamos.
Nesta campaña emplegamos el xenticliciu ‘playu’ -nome que reciben los moraores en Cimavilla, y la ‘xerga’ específica del barriu, el ‘vesre’, col que queremos implicamos más fondamente cola identidá playa, y reivindicar la cultura propia. Asina mesmo, el llema la campaña ye voluntarimaente polémicu, ‘Cimavilla pa los playos’ cola intención de xenerar alderique, pero -ye nidio- ensin la más mínima pretensión xenófoba que daquién podríe querer ver.
Trátase d’una parte más de la campaña qu’Andecha Astur vien desendolcando en defensa del turismu como un sector económicu secundariu nel nuesu país, y desixendo unes midíes de control que garantice que seya respetuosu col mediu ambiente, la identidá asturiana y los drechos de los trabayaores.
Nesi sen, Andecha Astur presentó énte’l ‘Principado’ una propuesta de Llei del Turismu Caltenible, na que s’entama desplicando que:
«La norma superior de regulación de l’actividá turística n’Asturies ye la Llei 7/2001, de 22 de xunu, de Turismu (BOPA núm. 156, de 6 de xunetu de 2001; BOE núm. 203, de 24 d’agostu de 2001; con cabera actualización del 25 d’avientu de 2010). Ventitrés años dempués de la so redaición, la rialidá del seutor evolucionó de manera tala que la llei convirtióse nun preséu poco útil en munchos aspeutos y les circustancies d’anguañu desixen una actualización afayaíza del testu.
Poro, convién a la ciudadanía asturiana que’l Gobiernu asturianu asuma la importancia d’una reforma urxente de la Llei 7/2001, de 22 de xunu, de Turismu.
L’actualización que resulta necesaria entama pol conceutu mesmu del turismu que deseyamos p’Asturies, y que debería espeyase yá nel entítulu de la nuea norma: Llei del Turismu Caltenible…»
