La sentencia del Casu Riopedre dexa n’evidencia al es-presidente del “Principado”, cuya dimisión como responsable políticu ye obligada. Nun tien que facer más que lo que pide’l PSOE a otros partíos en casos asemeyaos de corrupción.
Asturianu / Español
La sentencia del Casu Riopedre, pesia imponer penes muncho menores de les pidíes pola acusación y el propiu “Principado”, determina nidiamente la culpabilidá del que demientres munchos años foi Conseyeru d’Educación del “Principado” baxo los gobiernos d’Areces, de quien siempres foi man drecha. Por ello ye evidente la responsabilidá política direuta del entós Presidente del “Principado” qu’agora, nel so puestu de Senador en Madrid, quier pasar desapercibíu ensin asumir les consecuencies de la so xestión.
Álvarez Areces tien qu’asumir les sos responsabilidaes polítiques y per ende dimitir darréu, que ye precisamente lo que pide’l PSOE que faigan los responsables políticos d’otros cargos públicos xulgaos por corrupción.
Dexando de lllau les ruines condergues, con tres años más per delantre de recursos, los defeutos d’istrucción del Casu Riopedre, de la inxustificable lentitú de la xusticia, de la negativa a investigar tolos casos de corrupción que salíen al pasu cola investigación -munchos de los cualos implicaben al PSOE, sinon direutamente al propiu Areces- la sentencia d’esti casu perafita la culpabilidá del esconseyeru d’Educación y la so direutora xeneral, fasta tal puntu que paez imposible qu’Areces nun fuera conoceor d’ello.
Álvarez Areces, l’es-presidente del “Principado” que pasará a la hestoria como ún de los mayores responsables del esfarrapamientu económicu, social, medio-ambiental y cultural d’Asturies, tendrá qu’asumir les sos responsabilidaes nesti casu de corrupción, pero tamién tendrá que responder xudicialmente por otros munchos casos, como el d’El Musel, vestidos de novia o’l Casu Villa – Fondos Mineros. Por más que la rede mafiosa-clientelar del PSOE consiga safalu temporalmente de temes como’l del Niemeyer, la so estela de corrupción nun quedará impune.
