Andecha Astur torna a proponer al “Principado” la reconocencia oficial del 25 Mayu

Como vien faciendo coincidiendo colos aniversarios de la declaración de Soberanía de 1808 Andecha Astur presentó na Xunta Xeneral del “Principado” una propuesta pa que “asuma los fechos hestóricos y los conteníos políticos d’aquel 25 mayu de 1808, aprebe una resolución afitando que la soberanía reside nel Pueblu Asturianu y oficialice la cellebración istitucional d’esta fecha como espresión y reivindicación del drechu a decidir que mos correspuende como Pueblu”.

La propuesta que torna a presentase ca 25 Mayu enxamás nun mereció rempuesta nin dengún interés nin pol «Principado» nin por dengún de los grupos con representación parllamentaria, que coinciden na ñegación y tapecimientu d’esta parte de la hestoria asturiana na que la Xunta Xeneral del Principáu, baxo la presión del Pueblu Asturianu, declárase Xunta Suprema, y reconoz la soberanía popular asturiana declarándose una nación independiente del reinu d’España.

Dende la rialidá que carecemos anguañu, con una istitución -el «Principado»- y un Estatutu impuestos dende Madrid, la reivindicación d’esti primer actu d’autodetermín d’Asturies na dómina contemporania ye especialmente importante dao la necesidá que tenemos d’afitar que la Soberanía reside nel Pueblu Asturianu, y superar l’actual marcu xurídicu-políticu que supón l’Estatutu impuestu y la propia Costitución española que ñega’l nuesu drechu a decidir llibremente’l nuesu futuru políticu.

Per otru llau, hai de remembrar que coincidiendo con esta fecha, el 25 Mayu, Andecha Astur cellebrá esti sábadu 26 el so XXI Díi d’Andecha con estremaes actividaes ente les que destaca un actu d’homenaxe al 25 Mayu de 1808 cola colocación d’un ramu lloréu a les puertes de la Sala Capitular onde tuvo llugar la mencionada declaración de Soberanía.