“Como nel 34 hai qu’afitar un proyeutu políticu de tresformación social que tea Asturies como marcu específicu d’actuación”
Con eses pallabres Marcos Fernández resumió la so intervención política nel actu d’homenaxe a la Revolución Asturiana d’Ochobre’l 34 cellebráu ayeri en Llangréu. L’homenaxe qu’aconceyó nel cimenteriu Pando a decenes de presones escomenzó poniendo un ramu na tumba del presidente del Conseyu Soberanu, Belarmino Tomás, y continuó cola intervención política de Marcos Fernández na que, tres desplicar la importancia que tien nun escaecer la propia hestoria, y reivindicar la esistencia d’un filu conductor ente los revolucionarios asturianos d’Ochobre’l 34 y les presones que participaben nel actu, apostóse por deprender d’aquella esperiencia y sacar les debíes concluxones pa l’Asturies d’anguañu.
“Acullá de remembrar la revolución trunfante, la proclamación de la República d’Obreros y Campesinos d’Asturies, la invasión del exércitu de la República Española que llegó a movilizar les tropes coloniales de Marruecos, la llucha heroica del Pueblu Asturianu en defensa de la Revolución, la negociación en planu d’igualda col exércitu español y l’incumplimientu por parte d’ésti del alcuerdu algamáu, col regueru d’asesinatos y represión; tenemos ser quien a ver les causes que propiciaron qu’el Pueblu Asturianu llevare alantre esta revolución”
Nesi sen, y tres recordar que los protagonistes “nun fueron seres sobronaturales, sinon los nuesos güelos y bisagüelos”, y aprofitando pa reivindicar el siempres escaecíu papel de la muyer na revolución, destacó que la esistencia d’un proyeutu de tresformación social común, la evidencia de qu’Asturies ye’l marcu específicu d’actuación, y sobro too, la capacidá de tar perriba les diferiencies polítiques esistentes (socialistes, comunistes, anarquistes, republicanos…) nun oxetivu común; son la desplicación d’una revolución reprimía sangrinamente pola República Española, “esa república asesina que tovía hai asturianos que defenden”.
Per ende, les concluxones a les que llega son que, “como nel 34 hai qu’afitar un proyeutu políticu de tresformación social que tea Asturies como marcu específicu d’actuación”, faciendo un llamamientu a trabayar por esi proyeutu d’una forma costructiva “les diferiencies dientru d’un marcu común son enriqueceores, lo importante ye saber ónde se ta. Lo que mos xune ye la llucha por una sociedá xusta ya igualitaria dientru d’una Asturies soberana, esa ye la llinia que marca los que tamos d’un llau y los que tamos d’otru. Lo mesmo que nun podemos dir de la man de denguna sucursal española n’Asturies, nin de denguna propuesta de caltenimientu o involución social por mui asturiana que seya, tenemos que ser quien a xuncir esfuercios pa ufierta-y al conxuntu de la sociedá asturiana una alternativa viable na qu’el Pueblu Asturianu seya l’auténticu protagonista”.
L’homenaxe, especialmente positivu en tola intervención política, reivindicó la necesidá d’avanzar haza «una segunda República d’Obreros y Campesinos d’Asturies», y finó con un emotivu canciu del hinu “La Flor del Agua” y un ¡Puxa Asturies Llibre y Socialista!
