Por presuntu incumplimientu competencial y dañu a drechos educativos básicos de vecinos d’Aguanes (Allande)
Andecha Astur acaba pidir a la Fiscalía Superior d’Asturies qu’abra dilixencies pola presunta responsabilidá civil o penal de Fernando Lastra (Conseyeru d’Infraestructures, Ordenación del Territoriu y Mediu Ambiente, PSOE) y José Antonio Mesa Pieiga (alcalde d’Allande, PSOE), pol fechu de que pudieren tar incumpliendo les sos obligaciones competenciales y dañando drechos básicos de vecinos del conceyu Allande. [Testu íntegru denuncia]
El casu céntrase nel tremendu abandonu de la pista d’acesu a la Sierra El Valledor, ente les llocalidaes de Robledo y Aguanes (Allande). La situación ye tala que se ta poniendo en pelligru a vecinos, ganaeros, trabayaores forestales, carteros, trabayaores de telecomunicaciones… que se ven na obligación de percorrela. Amás, Fernando Lasta podría tar torgando drechos educativos básicos a dos families residentes d’Aguanes, al ñegase a que’l Consorciu de Tresportes proceda a llicitar la contratación d’un vehículu especial amañosu pa tarrenos montañosos, col envís d’atender la ruta de tresporte escolar que la Conseyería d’Educación reconoz ente les llocalidaes d’Aguanes y Robledo. Al nun unviar tresporte escolar fasta Aguanes, les families vense obligaes a treslladar elles mesmes a los sos fíos (12 km diarios) per una pista perpelligrosa, pa que puean coyer en Robledo l’autocar escolar que los lleva al Colexu Berducedo. Fernando Lastra (finura y democracia ente too) llegó calificar a estos vecinos d’antisistema y a menacialos públicamente cola intervención de la Fiscalía de Menores si los neños nun diben a escuela poles males condiciones de la pista, sobro too nel iviernu.
L’Alcaldía d’Allande y la Conseyería d’Infraestructures quinxeron iguar el problema convidando a una de les familes a desfacese de la so fía, zarrándola de llunes a vienres na Escuela Llar d’Allande (anguañu vacía). Al pocu tiempu’l PSOE tamién quinxo acabar cola contestación popular ufriéndo-y a una de les families un pisu de proteición oficial en La Puela; la familia ñegóse porque supondría renunciar a la so voluntá de residir nel so entornu familiar tradicional asina comu a los sos medios de vida, allugaos n’Aguanes.
El PSOE recurre a cualisquier práutica, fasta les non democrátiques, pa “iguar” los problemes de los pequeños pueblos asturianos. La idega’l PSOE ye siempres la mesma: vaciar eses aldegues enantes qu’invertir lo necesario pa en caltener nelles condiciones de vida xustes y dignes.
Esta estratexa de potenciar el despoblamientu de les esnales d’Asturies espéyase agora perbién nel apueste’l PSOE por llantar el so “nueu” inventu: l’Ária Central Metropolitana d’Asturies (una idega que yá ruxía nos años 80). Precisamente, Andecha Astur presentó un vídeu entituláu “Aguanes. Cuandu se castiga a l’Asturies rural”, protagonizáu por Sureyna Muñiz vecina d’Aguanes, nel alderique que la organización entamó esti llunes nel Clú Prensa de La Nueva España, en Xixón, nel marcu d’un debate públicu sobro les dañibles consecuencies que tendría pa la nación asturiana llantar esa figura del Ária Central Metropolitana, cola que’l PSOE quier controlar importantes sovenciones europees que sostituyan a los “chiringuitos” colos que la mafia del socialismu español tuvo viviendo de les sovenciones mineres y otres.
