El manifestamientu pola Oficialidá d’esti sábadu perafita’l compromisu de la sociedá asturiana cola nuesa llingua nacional
Movilizar a miles de presones nuna xornada como la del sábadu na que’l Nuberu quinxo tener el so protagonismu, dexa perfechamente espeyao’l terriu compromisu de la sociedá asturiana na defensa de la oficialidá de la nuesa llingua nacional, y pon n’evidencia al “Principado” y los partíos ellí representaos, ñegaos dafechu a reconocer un drechu democráticu tan básicu como’l de poder emplegar llibremente la propia llingua.
Lo cierto ye que talamente como denunció Andecha Astur, la oficialidá nun llegó nel 2018 como allegremente prometieron munchos y, de nun camudar la rellación de fuercies na Xunta Xeneral cola entrada nestes elleiciones del nacionalismu d’izquierda asturianu, tien poques traces de llegar nel 2019, porque lo cierto ye que pesia les múltiples declaraciones de los diputaos del “Principado” teóricamente defensores de la oficialidá, nesta postrer llexislatura nun hebio dengún avance na reconocencia de la nuesa llingua nacional, y sí munches declaraciones mediátiques valeres de conteníu.
Nel manifestamientu del sábadu demostróse que la sociedá asturiana ta fartuca de posturéu y promeses, y que quier que la oficialidá seya una rialidá yá. Foi un claru toque d’atención a los partíos que dicen tar pola oficialidá per llueu, como sucursales que son, nun faen un res por ello, nin siquier nos ayuntamienos onde formen parte del gobiernu, onde nun fueron quien a aprebar unes simples Ordenances municipales d’Oficialidá, a diferiencia de lo que se fexo n’otros conceyos como Bimenes o Noreña onde la presencia del soberanismu asturianu ye bultable
En rialidá’l manifestamientu del sábadu nun ye atalantable si nun ye en clave elleutoral, talamente como se dixo na intervención final del manifestamientu, desixéndose un compromisu cola oficialidá a les fuercies polítiques qu’acupen los escaños de la Xunta Xeneral tres los prósimos comicios de mayu. Pero nós vamos dicir más: la oficialidá pasa por consiguir qu’Andecha Astur tea ellí representada, porque ye fato enfotase en quien promete pero nun consigue avances en tola llexislatura. De fechu, namás una fuercia política asturiana, llibre d’ataures con Madrid, pue asegurar un futuru dignu pa la llingua asturiana.
