Andecha Astur denuncia a la Xunta Elleutoral

La Xunta Elleutoral ye denunciá por incumplir la sentencia’l Tribunal Costitucional que ganó Andecha Astur sobro l’usu del asturianu nes elleiciones.

Andecha Astur pide a l’Academia de la Llingua qu’exerza les sos competencies d’amparu de los drechos llingüísticos.

La Xunta Elleutoral d’Asturies acaba refugar un escritu n’asturianu d’Andecha Astur, desixendo que tien de ser presentáu “nuna llingua oficial”. Amás, la Xunta Elleutoral nun desplica los argumentos o testos  llegales nos que sofita tan sosprendente determín. Llama l’atención que ye la mesma Xunta que nesti procesu elleutoral d’abril yá aceutó otros escritos n’asturianu que presentemos, y ye la mesma Xunta que validó dafechu l’usu de les papeletes n’asturianu que distribúi Andecha Astur ente los sos votantes.

Andecha Astur llogró, trabayosamente, nel añu 2000 que’l Tribunal Costitucional español reconociere a tol Pueblu Asturianu’l so drechu a usar la llingua nacional nos procesos elleutorales (STC 48/2000). Dende entós Andecha Astur siempres se dirixó n’asturianu a la Xunta Elleutoral d’Asturies (comunicaciones, presentación de candidatures, papeletes de votu…)  y los sos escritos foron sistemáticamente aceutaos demientres los caberos 19 años. Ye sinificatible que partíos españoles comu PSOE, IU, Podemos… ñegáronse nestos 19 años a exercer esti drechu democráticu ganáu nos tribunales por Andecha Astur.

Creyemos que’l motivu pa que la Xunta Elleutoral camudare de criteriu, tres 19 años d’acatamientu de la sentencia del Tribunal Costitucional, ye de triba política. Nestes dos décades los escritos qu’Andecha-yos dirixó n’asturianu cincaben siempres a custiones alministratives (erros en datos, notificación de representantes, etc.). Pero’l documentu refugáu nun pide una caxigalina a la Xunta, píde-y que notifique a les meses elleutorales la correcha interpretación de la llexisllación española pa que nun se produzan situaciones illegales comu les asocedíes nes caberes elleiciones españoles: retirá de papeletes d’Andecha Astur de les meses elleutorales, anulación de votos emitíos a favor d’Andecha Astur con papeletes impreses n’asturianu…

Precisamente cuandu Andecha Astur pide a la Xunta Elleutoral qu’ésta informe a les meses de la llexisllación que protexe’l votu n’asturianu, ye cuandu, tres acatar demientres 19 años la sentencia’l Costitucional, la Xunta Elleutoral camuda sospresivamente de criteriu y escueye desobedecer n’abertal al Tribunal Costitucional español.

Ello sinifica que la Xunta Elleutoral nun va tomar iniciativa dala pa garantizar la presencia de papeletes d’Andecha Astur nes meses elleutorales, nin pa garantizar el valir de los votos emitíos n’asturianu a favor d’Andecha Astur. Ye dicir, l’Estáu español nun quier garantizar el drechu del Pueblu Asturianu a emplegar la so llingua nesti procesu elleutoral, drechu protexíu pol so propiu Tribunal Costitucional. L’Estáu español nun asegura al Pueblu Asturianu un recuentu xustu, oxetivu y veraz.

Tres esti gravísimu determín de la xusticia española, Andecha Astur vien de recurrir énte la Xunta Elleutoral Central y emplegará tolos recursos posibles na defensa llegal de los drechos llingüísticos y políticos del Pueblu Asturianu.

Asinamesmo, Andecha Astur acaba pidir amparu a l’Academia de la Llingua Asturiana, que ye la istitución del país encargá estatutariamente de curiar los drechos llingüísticos asturianos. Andecha Astur pidió ser recibía pola ALLA pa presenta-y esti casu de represión llingüística y antidemocrática, asina comu que l’ALLA entame les iniciatives necesaries pa garantizar el drechu los asturianos a utilizar la llingua nacional nos procesos elleutorales, comu asegura la sentencia’l Costitucional que ganó Andecha Astur nel añu 2000.