Les sos idegues y les pallabres que dexó escrites son vixentes dafechu
Nel 34 cabudañu del fallecimientu d’Andrés Solar, Andecha Astur homenaxeó delantre la placa que lu recuerda nel cimenteriu Deva, a esti nacionaliegu asturianu que, al so compromisu social y políticu, amestó una obra lliteraria autodidacta y n’asturianu d’especial valir.
Precisamente, chando man d’esta obra lliteraria, la intervención política de Llucía Fernández foi repasando l’actual situación social, llaboral y demográfica d’Asturies atopando, nes palabres escrites por Andrés Solar hai más de 30 años, una descripción tan «profética» que les fai dafechu acertaes y actuales.
Mentes lleía l’hestóricu poema «Prúyemos un Pueblu Llibre» Llucía Fernández fizo un altu nel versu «Xunto la fábrica encesa,/ la mina prieta…» pa remembrar que precisamente güei, el Reinu d’España vien de presllar les dos postreres mines asturianes, dexando un ermu de paru, precariedá y emigración forciada; con pallabres perdures pal presidente español, Pedro Sánchez, que tovía s’atrevió afirmar qu’ello diba acarretar prosperidá «Prosperidá pa los Villa, pa la Mafia político-sindical asturiana que cobró por collaborar nel preslle de la minería asturiana, pa la Mafia’l PSOE-SOMA-UGT; prosperidá pa Madrid que se quedó colos más de los Fondos Mineros, prosperidá que ye miseria p’Asturies, pa los asturianos»
Les referencies a la obra d’Andrés Solar, miembru fundaor del Ensame Nacionalista Astur y defensor dela llingua asturiana, sirivieron pa finar l’actu d’homenaxe faciendo un llamáu a continuar na llucha colos postreros versos de «Hai que siguir» «Hai que siguir asina y equí./ Hai que siguir, hai que siguir».
A la fin de la intervención dellos de los asistentes llieron poemes d’Andrés Solar y féxose una ufrienda floral.
CARTA A ANDRÉS SOLAR. Mariano Suárez
