25 Mayu, XXII Díi d’Andecha

Esti sábadu 25 de mayu ANDECHA ASTUR cellebra’l XXII Díi d’Andecha reivindicando la declaración de Soberanía de la Xunta Suprema

Como vien faciendo  dende’l so aniciu, ANDECHA ASTUR cellebra’l so Díi faciéndolu coincidir col 25 Mayu, fecha na que tuvo llugar la declaración de Soberanía de la Xunta Suprema en 1808, no que ye’l primer actu d’autodetermín d’Asturies na dómina contemporánia.

El tradicional actu d’homenaxe tendrá llugar esti sábadu 25 a les 13:30 a les puertes de la Sala Capitular -Plaza Corrada del Obispo- onde tuvo llugar la mencionada declaración de Soberanía cola qu’Asturies recuperó la independencia nel sieglu XIX.

Nesta ocasión, y como quiera que mos atopamos en xornada de reflexón, l’actu llimitaráse a la colocación d’un ramu lloréu, ensin mayor intervención política, considerándose que’l propiu homenaxe ya costitúi por sigo mesmu una defensa de la nuesa identidá nacional y una reclamación de la Soberanía política de la qu’agora adolecemos, sometíos a una Costitución española y un Estatutu d’Autonomía que nin garantiza nin respeta los nuesos drechos colleutivos como Pueblu.

Darréu tendrá llugar una espicha nos llocales de la organización n’Uviéu.