Llucía Fernández, candidata d’Andecha Astur, aconceyó con una representación de la Plataforma d’Afeutaos pola Hipoteca pa poner en común propuestes y recoyer datos actualizaos de la situación actual de los desfiucios
Les propuestes recoyíes nel programa elleutoral coinciden, con perpoques desemeyances, colo que pidi la Plataforma.
A lo llargo del conceyu calteníu falóse de comu camudó l’escenariu nos caberos años: les desfiucies hipotecaries tan prauticamente paralizaes pero multiplíquense les de vivienda d’arriendu, con una media de dos diaries, munches d’elles de viviendes de propiedá bancaria. Les presones desfiuciaes d’arriendos cuasique nunca consiguen acesu a una vivienda d’emerxencia (cola esceición de los casos de violencia de xeneru).
La deficiente xestión de la vivienda social, especialmente dende que garró la so xestión Fermín Bravo, fae que namás dos presones seyan les encargaes de xestionar les 9000 viviendes disponibles n’Asturies –pente sociales y de proteición pública- bona parte d’elles desocupaes o que nun s’alcuentren en condiciones d’habitabilidá. Nes desfiucies hipotecaries ye avezao conseguir una vivienda nun plazu razonable, pero nos d’alquiler o ye un casu de violencia de xeneru o cuasique nun se conceden
La falta de regulación específico o la llibre interpretación de la regulación esistente lleva a situaciones tan llamentables comu qu’una presona trate de ceder la so vivienda pa usu social y que naide recueya les llaves o que seyan precisos dos años ensin vivienda pa qu’una persona pase a considerase “ensin llar”. La xestión de la vivienda d’emerxencia, qu’anantes se resolvía nel –yaá llargu- plazu de 3 meses, agora puede allargase acullá d’un añu.
El resume de la situación ye que tenemos n’Asturies más de 84.000 viviendes vacies –acordies la cabera auditoria, fecha nel 2012- y miles de presones viviendo na cai, compartiendo cases o en condiciones d’infrahabitabilidá.
Les midies propuestes, pasen por poner llendes a la especulación inmobiliario, sancionando a les entidaes o persones propietaries de vivienda vacía ensin usu que nun se pongan en mercáu, llegando a la expropiación cuando fore necesario y l’aprebación d’una llei hipotecario que defenda los intereses populares y someta a control públicu les iniciatives de desagospiu. Tamién se propón la creación d’un parque de viviendes publiques afayaizu con alquileres baxos y fácil acesu y l’axilización de la concesión de les ayudes d’alquiler y de les viviendes sociales.
Una de les midies nes que la PAH añadió puntualizaciones a les propuestes d’ANDECHA ASTUR foi na de repoblar fasteres rurales facilitando l’acesu a les viviendes nestes fasteres pa presones ensin llar, ya que pa qu’ello fore efeutivo sedría necesario garantizar primero les condiciones de vida, servicios sociales, comunicaciones y acesu a tresporte, educación y sanidá nestos pueblos.
