*Mariano Suárez. Xunta Executiva d’Andecha Astur
11 de xunetu de 2019. Al riscar paez un díi normal. Llueu entra Adrián Barbón na Xunta Xeneral a falucar comu candidatu a presidente del “Principado”. Cuandu fina, dalgún mediu de comunicación diz qu’acaba d’entamar la “era Barbón”. Pero los diplodocus del PSOE siguen pastiando con galbana na cai Fruela. ¿Entós? ¿Qué pasó nel nuesu Paraísu pa qu’entame una nuea era?
Sólo esto: Barbón faló d’oficialidá na Xunta Xeneral y echó cuatru pallabres n’asturianu. Con esto yá pertremaron los pegollos del planeta. Echemos una güeyaína a lo asocedío…
La razón fondera de los cambeos
Ye cierto, el discursu de Barbón pa la so investidura ye’l primeru d’esta triba nel que se mienta la oficialidá de la llingua asturiana y na que s’inclúin unes pallabres nesti idioma. ¿Y? Sólo faltaría que tres 40 años de dictaúra franquista, 44 de réxime borbónicu y 36 de mafia’l PSOE, agora surda una nuea era porque falen de la llingua que siempres prohibieron.
Barbón fala del asturianu y enrieda cola oficialidá. Sí. Pero nun ye por gustu. Nun ye porque’l PSOE tea más cerque de tornase democráticu. Ye porque la rialidá oblígalu. Ye porque l’almiratible resistencia del Pueblu Asturianu a renunciar a la so identidá, magar tantos años de castigu, fuercia al PSOE, nun tiempu de mayoría minoritaria y de frañimientu del mapa políticu, a falar d’ello. Pura conveniencia. Simple llaváu de cara. Blanquiando, de la man d’IU, los sos currículos pringosos de represores llingüísticos.
La razón pola que Barbón tien de falar d’oficialidá ye ésa: qu’Asturies ñégase a morrer ente les sos manes. Que mentantu los partíos españoles (toos ellos, ensin esceición[1]) mos aperten el pescuezu pa que nun falemos más, sacámos-yos la nuesa llingua. Ensin rendición.
Barbón fala d’oficialidá porque, tres décades d’intentalo, el réxime borbónicu y los partíos españoles ven que nun consiguen qu’arrenunciemos al nuesu idioma. El PSOE de Barbón reconoz asina la nuesa resistencia. Y cuasi siempres, resistir ye trunfar.
El valir d’un xestu
Poro, duel muncho ver cómu l’Academia de la Llingua Asturiana califica’l xestu de Barbón comu “pasu simbólicu de gran importancia”. Igual que nun se pue compartir qu’Iniciativa pol Asturianu lu considere “perpositivu”.
El matón ta afogándote apertando coles dos manes el to pescuezu. De sópitu, retira provisionalmente una man. Entós vas y… ¿das-y les gracies por ello? Sólo dende una posición de debilidá másima, que nun ye nin digna nin asumible, se pue atalantar comu “importante” o “positivu” el xestu de Barbón.
El comportamientu y les pallabres de Barbón na Xunta Xeneral tienen el mesmu valir que’l movimientu que fae’l magu con una man enguantá: distrayer, mentantu cola otra man aperia’l trucu col que te va engañar. Poro, cuandu Barbón ta nun atril con micrófonu nun podemos entregar tola nuesa atención a lo que diz o a lo que ximielga; nin un segundu podemos dexar de xixilar los sos fechos, la práutica política del PSOE. Y güei sigue siendo esautamente la mesma: la de represor llingüísticu.
Un Barbón con antecedentes
Comu bon discípulu de Fernández Villa que ye, Barbón lleva yá cuasi un cuartu sieglu viviendo del panchón que reparte la mafia’l PSOE. Nestos cuasi venticincu años foi:
- Secretariu Xeneral de les mocedaes socialistes en Llaviana y nel valle’l Nalón.
- Vicealcalde del Conceyu Llaviana.
- Alcalde del Conceyu Llaviana.
- Miembru de la Comisión Executiva de la FSA-PSOE.
- Miembru’l Comité Federal del PSOE.
- Secretariu xeneral de l’Agrupación Socialista de Llaviana.
- Diputáu nel Congresu español.
- Presidente de l’Asociación de Comarques Mineres españoles.
- Secretariu xeneral de la FSA-PSOE.
- Diputáu na Xunta Xeneral asturiana.
Barbón ye un home del aparatu. Trabaya pal aparatu y vive de los puestos que consigue con ello. Naide asina pue ser presona de confianza.
Foi alcalde de Llaviana ente los años 2008 y 2017. Nesos años Barbón siempres tuvo al so favor una mayoría pa poder declarar oficial l’asturianu en Llaviana; ente los conceyales del PSOE, d’IU y en dellos momentos tamién de Podemos, pudo facelo. Curioso: ¡nun lo fexo enxamás! 10 años d’alcalde: 10 años de represor llingüísticu.
Y agora ¿hai de da-y les gracies pol saleru con que ximielga una man apuntando pa una oficialidá que siempres prohibió?
Viendo esto, ye dolioso tamién qu’en mayu de 2019 voceros de la Xunta pola Defensa de la Llingua se refiriesen a Barbón (ensin mentalu) falando de “la llegá d’una nuea forná de cabezaleros llibres de los prexuicios de la xeneración anterior”.
A ver, si’l PSOE permitió que Barbón seya agora candidatu a presidente d’Asturies ye porque ta seguru de que con él la llingua d’Asturies nun va algamar enxamás l’estatus políticu que tien el catalán, l’euskera o’l gallegu. ¿De qué un partíu español va poner agora de presidente a un bravu defensor de la nuesa identidá asturiana?
Les primeres mentires
Nun se pue maquillar comu “positivu” o “importante” el discursu d’un represor del asturianu. Lo meyor ye dir señalando yá les mentires que se-y ven.
La primera: ye de los que diz qu’Asturies tien dos llingües, l’asturianu y l’eonaviegu. En cuantes a esta falsedá, dos coses. La primera: remembrar cómu l’Academia de la Llingua Asturiana, nos años 80 del pasáu sieglu, nos sos primeros cursos de formación pa enseñantes, afitaba que lo que se falaba ente l’Eo y el Navia yera una variante dialeutal más del idioma asturianu. La segunda, señalar, eso sí, qu’en tou casu ye preferible la denominación d’eonaviegu qu’emplega Barbón que la de gallegu-asturianu qu’usen otros, pos éstos ufren a Galicia la posibilidá de que pretenda tener competencies de tutela llingüística sobro una parte’l territoriu asturianu.
La segunda mentira: “el mio gobiernu va trabayar pa torgar la desapaición del asturianu”, bramó Barbón. ¡Yá t’oyí, navaya! Remitímosmos al currículum de Barbón y a los 36 años de gobiernu’l PSOE n’Asturies. Ensin más.
La tercer mentira: el discursu de Barbón quier facer creyer a los asturianos que la oficialidá ta nes sos manes, nes del PSOE, qu’ellos mos la puen trayer. Hai mentires que nun tienen perdón, la verdá. El PSOE nin quier nin pue consiguir la oficialidá. La so condición de partíu español y los sos 36 años de mandu n’Asturies amuesen a les clares que nun quier. Pero ye que tampocu nun pue.
Declarar la oficialidá del asturianu comu llingua d’Asturies desixe reformar el “Estatuto de Autonomía” que’l réxime borbónicu y los partíos españoles mos impuxeron en 1981, prohibiéndomos la posibilidá de votalu. Y el propiu estatutu regula les condiciones pal so camudu: la iniciativa la reforma tien de cuntar col sofitu d’una cuarta parte de los diputaos de la Xunta Xeneral y l’aprebación de cualisquier reforma precisa del votu favoratible de tres quintos de la mesma (artículu 56, títulu VI). Comu hai 45 diputaos y diputaes, faen falta polo menos 27 p’aprebar la oficialidá.
Estudiemos la presencia na Xunta Xeneral de partíos supuestamente sensitibles pa col asturianu…
| Llexisllatura | Presidente | Nu diputaos/es | |||
| PSOE | PCA/IU | PAS | PODEMOS | ||
| I
(1983-1987) |
Pedro de Silva (PSOE) | 26 | 5 | – | – |
| II
(1987-1991) |
Pedro de Silva (PSOE) | 20 | 4 | – | – |
| III
(1991-1995) |
Juan Luís Rodríguez-Vigil Rubio (PSOE)
Antonio Ramón María Trevín Lombán (PSOE) |
21 | 6 | 1 | – |
| IV
(1995-199) |
Sergio Rutilio Marqués Fernández (PP) | 17 | 6 | 1 | – |
| V
(1999-2003) |
Vicente Alberto Álvarez Areces (PSOE) | 24 | 3 | – | – |
| VI
(2003-2007) |
Vicente Alberto Álvarez Areces (PSOE) | 22 | 4 | – | – |
| VII
(2007-2011)
|
Vicente Alberto Álvarez Areces (PSOE) | 21 | 4 | – | – |
| VIII
(2011-2012) |
Francisco Álvarez-Cascos Fernández (Foro) | 15 | 4 | – | – |
| IX
(2012-2015) |
Javier Fernández Fernández (PSOE) | 17 | 5 | – | – |
| X
(2015-2019) |
Javier Fernández Fernández (PSOE) | 14 | 5 | – | 9 |
| XI
(2019-¿2023?) |
¿Adrián Barbón Rodríguez (PSOE)? | 20 | 2 | – | 4 |
El PSOE pudo declarar la oficialidá nes llexisllatures I, III, V y X. Tolos presidentes del PSOE cuntaron en dalgún momentu con 27 diputaos/es d’estremaes fuercies que se dicíen favoratibles a la oficialidá. Pudieron ponese esa medalla democrática los presidentes Pedro de Silva, Vigil, Trevín, Areces o Javier Fernández. Pero nun quinxeron abandonar el so papel hestóricu de represores de la identidá asturiana.
Y agora, precisamente agora, cuandu’l PSOE nun pue arrexuntar esos 27 diputaos/es, ye cuandu’l gallu Llaviana vien… ¿a vendemos oficialidá? Al tiempu que s’atreve, amás a acusar a la drecha de tener fobia al idioma d’Asturies.
La gran trampa
N’ochobre de 2018 el caberu congresu de la FSA-PSOE aprebó, namái por cuatru votos de diferiencia, incluyir un modelu d’oficialidá nel so programa elleutoral. En mayu de 2019, espublizó esi programa, col títulu “400 medidas para la mejor Asturias”.
La midía 186 diz (n’español, claro): “Asturies ye rico nel so padremuñu cultural, tanto material comu inmaterial. Padremuñu cultural, heriedu de la nuesa hestoria, que tenemos de curiar y protexer. Ente esi padremuñu a protexer la la sobrevivencia del asturianu y l’eonaviegu en pelligru de desapaecer. Pa ello, dientru’l marcu costitucional y la proteición xurídico qu’ufre a les estremaes llingües de España, na prósima llexisllatura Asturies deberá entamar l’alderique sobro la reforma l’Estatutu y, poro, de la reconocencia oficial de la llingua asturiana y l’eonaviegu (nel so ámbetu), guetando un modelu que se carauterice pola proteición, la voluntaridá y la non imperatividá, costruyíu sobro los pegollos del alcuerdu y el consensu”.
Doliosamente, otra vuelta más, l’Academia de la Llingua apuróse p’aplaudir: calificó de “prudente y moderá, pero tamién clara” la nuea postura´l PSOE.
Pero tres la prosa de la midía 186 ta la gran trampa. Barbón, en xineru de 2018 yá lo dixo: el PSOE fala non d’una oficialidá comu la del euskera, catalán o gallegu, sinón d’una “oficialidá a l’asturiana” que califiquen de “oficialidá amable”. Y en mayu de 2018 tornó dicilo: la meyor forma de protexer l’asturianu ye “afitando un modelu propiu d´oficialidá basáu na proteición y el consensu”.
Ehí ta la trampa, la gran trampa. Si en dalgún momentu’l PSOE va dar un pasu de verdá haza la oficialidá va ser pa llantamos una proteición llegal de los drechos llingüísticos bien inferior a la que tienen les demás llingües oficiales del estáu. Una “oficialidá amable”: nun prohibirán yá la llingua con descaru, sinón que la dexarán ehí, al debalu. A ver si la enferma va morriendo sola…
El PSOE nun va permitir que l’asturianu seya un preséu de cohesión social del Pueblu Asturianu. Nun va desixir al estáu español la delda hestórica que mos debe por nun financiamos comu a les demás naciones con llingua propio. Nun va poner l’asturianu comu llingua vehicular nel sistema educativu, va condergala a siguir siendo asinatura “voluntaria”. Nun va ufrimos una alministración pública asturfalante. Nun va facer del asturianu la so llingua de comunicación del gobiernu col pueblu. Nun va concedemos una RTPA dafechu n’asturianu.
El PSOE sólo podría permitir una situación na que meyoraren aparentemente los drechos llingüísticos de los falantes, pero na que necesariamente hubiere una subordinación llingüística ñidia del asturianu ente l’español.
El PSOE, y los demás partíos españoles, enxamás mos van conceder ná que nun pudieren tenemos dao yá en 1998, si-yos peteciere entós desendolcar la Llei d’usu y promoción del asturianu.
Mentantu se mos obligue a ser súditos del réxime los Borbones o cualquier otru réxime español, nun habrá Barbón que mos salve la llingua asturiana. Lo propio de los rexímenes españoles ye damos eso… “oficiali…ná”.
[1] Toos ellos, sí. Podemos tamién. Porque Podemos, lo mesmo qu’IU, enxamás pon la oficialidá comu condición pa llevar al poder al PSOE o pa cogobernar con elli.
