“Casu Barbón”: El lifting imposible del PSOE n’Asturies

Aupáu pol seutor SOMA del PSOE (el más implicáu na corrución), pol ablanquiamientu que siempes-y regalen Podemos ya IU, y pol sofitu de bona parte los poderes táuticos y cuasi tolos mediáticos, Adrián Barbón Rodríguez acaba convirtise nel novenu presidente d’esti “Principado” que’l Reinu d’España mos llantó y cuyu Estatutu mos prohibió votar.

Ente esti fechu, Andecha Astur espubliza el documentu “CASU BARBÓN”: EL LIFTING IMPOSIBLE DEL PSOE N’ASTURIES pa compartir cola sociedá asturiana l’analís que d’esta nuea situación tien el soberanismu políticu del país.

Tres el baturizu protocolariu y mediáticu que representó’l nomamientu de Barbón comu presidente del “Principado”, ANDECHA ASTUR topa dellos avances:

• El PSOE vese na necesidá de frañer cola so hestoria de corrución conxénita y col so antiasturianismu militante, amás tamién colos sos cabezaleros (Villa, de Silva, Rodríguez Vigil, Trevín, Areces, Javier… unos mayestros nesto).
• El PSOE vese obligáu a reconocer la grave crisis demográfica y renuncia al discursu mentirosu de les “lleendes urbanes”, qu’apregona’l mafiosu PSOE dende Tini Areces.
• El PSOE vese forciáu a falar d’oficialidá de la llingua d’Asturies (magar que nun tenga mayoría p’aprebala, magar que nun la quiera, magar que tracamundie arrémente la ofialidá rial de Catalunya, Galicia o Euskal Herria con una “seudoficialidá amable” de segunda categoría).

Sicasí, magar los avances, el soberanismu asturianu tamién ye mui rialista:

• Con más PSOE y con Barbón vamos siguir ensin tener un gobiernu bramente socialista. Continuarán cola so llínia de xestión neolliberal d’un sistema fondamente capitalista.
• Con más PSOE y con Barbón vamos siguir teniendo un gobiernu antiasturianu, anque lo disimulen, anque firme decretos nel despachu de Belarmino Tomás.

Pero si pa dalgo tenemos de tar preparaos ye pa un llexisllatura de xestos y símbolos (dicir daqué n’asturianu nel so discursu, rentabilizar emocionalmente la so familia enantes/durante/dempués de la investidura, poner una académica de la Llingua comu conseyera, firmar decretos nel despachu de Belarmino Tomás, visitar primero’l conceyu más pequeñu, etc.).

Alcordémosmos bien: la llexisllatura de Barbón va ser la de los xestos y los símbolos. Y el gabinete de comunicación presidencial va ser el primer muérganu vital de Barbón.

Poro, el principal oxetivu estratéxicu de la so política comunicativa ye “Barbón y cuanta nuea”. Esto ye: qu’escaezamos la responsabilidá del PSOE na crisis global d’Asturies, que creyamos que Barbón (magar que siempres trabayó y vivió del PSOE) tien “responsabilidá cero” na hestoria recién de la nuesa nación. Que veamos en Barbón ún superhéroe del PSOE que vien rescatamos de la crisis que causó’l mesmu PSOE (dalgo imposible).

Consulta la valoración completa que fae ANDECHA ASTUR en “CASU BARBÓN”: EL LIFTING IMPOSIBLE DEL PSOE N’ASTURIES.