Llucía Fernández, candidata por Andecha Astur-Agora Repúbliques al Congresu español, fai un llamamientu a afitar el protagonismu de la muyer y a movilizase’ esti 8M
Soi muyer. Ma de muyer. Nun pueo calteneme al marxe del miéu, a les muyeres mátenles, a les muyeres maltrátenles, asina, namás por ser muyeres.
Lleo la prensa, veo al telediariu, veo a la mio vecina. Sé lo que hai y contra lo que lluchamos. Ye duro. Mui duro. Pero cuento qu’hai que salir d’esti discursu del miéu, que nos vuelve a meter en casa, a llevar “protectores” fasta’l portal, a tar xixilaes “pol nuesu bien”, a escondemos, a ser les febles. Al miéu vencese-y con fuercia, non con medrana y siguir llorando déxamos onde mos quien, precisamente, los que mos ataquen.
Yo quiero una Asturies de muyeres fuertes, que salgamos a la cai, que glayemos, que mos riamos, qu’enseñemos les tetes si queremos, y si non, pues non, que nun tengamos miéu a la nuechi, ni al díe, dueñes de los nuesos cuerpos, de les nueses vides, del nuesu destín.
Quiero a les muyeres al frente de la recuperación d’Asturies. Viviendo nos pueblos que quien vacios, glayando nes manis que quien ermes, aguantando nuna Asturies que quien ver muerto, sacando alantre una reciella llibre y valiente (si, seyamos sinceros, el mayor porcentaxe de la reciella ye educáu por muyeres), educando un futuru pueblu asturianu cosciente de so y arguyosu.
Quiero ver muyeres asturianes en campu, na ciudá, nes fábriques, nos chigres, pero sobro tou quiero venms nes Cases de Conceyu y na Xunta, faciéndomos sentir, faciéndomos valir.
