Esti 8 de setiembre Andecha Astur llama a participar nel manifestamientu que convoca “Lluchando pola Soberanía”, y que sal a les 12’30 h. del Hotel la Reconquista, n’Uviéu.
Andecha Astur, ente la cellebración del Díi de la Nación Asturiana, comparte cola ciudadanía del nuesu país el convencimientu de que’l futuru d’Asturies ta nes sos manes. Y hai, dende’l compromisu, dende’l trabayu a comuña y dende la cai, un camín a percorrer que mos pue garantizar l’Asturies próspera que queremos pa los nuesos fíos, l’Asturies auténtica qu’heredemos de los nuesos antepasaos, l’Asturies soberana que mos pruye comu pueblu llibre.
Nun podemos ñegar que la cadarma política, económica y policial de dominación con que l’Estáu español somete Asturies ye enforma fornía. Ehí tán les llacerioses consecuencies d’ello: el paru xabaz, los emplegos temporales y mal pagaos, la destrución del texíu socioeconómicu, una emigración forciá de la mocedá qu’arrepuende a una política etnocida, la corrución istitucionalizá de los partíos españoles, la represión de la identidá asturiana, la discriminación competencial dientru’l so Estáu, l’intentu de fagocitar l’Asturies rural con un Ária metropolitana central, la sovención d’actos monárquicos y culturales españolizantes, la desatención de los sirvicios públicos básicos (sanidá, enseñu, tresportes…), la conversión de los sindicatos españoles en ferramientes del Estáu y de los intereses empresariales, les redes clientelares que texeron demientres décades PSOE-SOMA-UGT, la impunidá de los políticos responsables d’estes llaceries…
Nun ñegamos esa rialidá doliosa, ye más, llamamos a les asturianes y asturianos a vivir ca díi siendo coscientes d’ello, ensin dexase hipnotizar pola permanente campaña anestésica que desendolquen los partíos españoles, faciéndomos creyer que vivimos nun paraísu ñatural nel que too ye xusto y perfecho, y que, amás, debémos-yoslo a ellos.
El Reinu d’España estroza Asturies. Ca díi que pasa un poco más. Somos mui coscientes de qu’ésa ye la llabor que tienen los sos preseos políticos: el Gobiernu d’Adrián Barbón y la casta política apoltroná na Xunta Xeneral, qu’amás ca añu s’apropien de más presupuestu públicu pa convertilu en rentes y sueldos propios.
Pero, ente esta rialidá, señalamos l’impulsu, el pruyimientu que tenemos de sintir sabiendo que ta nes nueses propies manes la posibilidá de desfacemos de tola casta política española que mos prime y ponemos a comuña a refacer Asturies, a retomar el rumbu la nuesa nación.
El Reinu d’Asturies foi’l primeru la península, esistió y xorreció demientes sieglos, conformando d’aquella los pegollos de la nuesa identidá nacional: la llingua y la cultura d’Asturies. Milenta xeneraciones, los nuesos antepasaos, dedicaron la so vida a aperiar una Asturies digna pa tresmitimos un país onde poder realizamos comu ciudadanos llibres y comu Pueblu.
El respetu a la so memoria, la reconocencia de la nuesa propia dinidá y l’enfotu en poder tresmitir a les nuees xeneraciones una Asturies plena d’identidá, recursos y xusticia, tien d’aidamos a salir a la cai esti 8 de setiembre. Salir a la cai a cellebrar con arguyu’l Díi de la Nación Asturiana, el díi de la nuesa identidá y del nuesu enfotu soberanu. Salir a la cai a vindicar soluciones que seyan bramente socialistes pa los problemes d’Asturies. Salir a la cai a solidarizamos con toles asturianes y asturianos, pos comu Pueblu toes y toos necesitamos lluchar xuntos pol futuru que merecemos, nuna Asturies próspera y llibre.
Con vosotres y vosotros na cai. Por Asturies. Pola soberanía… ¡Puxa Asturies!
