Andecha Astur lleva a la Comisión Europea la discriminación llingüística nel Parllamentu Asturianu

• Andecha Astur presentó al traviés de la coallición Agora Repúbliques de la que forma parte, un escritu nel que pide a la Comisión Europea que se posicione respeutu a lo asocedío’l pasáu 1 d’ochobre nel Parllamentu Asturianu, asina como a la discriminación costante de los asturianos pol usu de la so llingua nacional.
• La Comisión Europea tien un plazu másimu de tres meses pa retrucar al escritu

El casu de discriminación carecíu por Berta Piñán, el pasáu ún d’ochobre, cuando se-y torgó l’usu de la so llingua, ye ún pente milenta casos de represión llingüística carecíos n’Asturies, agraváu nesti casu pol fechu de ser l’actual Conseyera de Cultura del “Principado”

L’argumentación, por parte de los lletraos de la cámara autonómica, de que “los miembros del gobiernu nun tienen drechu a usar la llingua propia, cosa que si pueden facer les diputaes y diputaos” discriminatoria, siendo amás contraria a lo afitao na Carta de los Drechos Fundamentales de la XE (art.21) onde se recueye que “prohíbese toa discriminación, y en particular la exercía por razón de llingua” y a la resolución del Parllamentu Européu sobro les llingües europees menaciaes d’esapaición y la diversidá llingüística.

Amás, el Comité de Ministros del Conseyu d’Europa ya emitiere’n so momentu una recomendación istando a España a aplicar la Carta Europea de Llingües Rexonales y Minoritaries.

Coscientes comu somos de la inutilidá de pidir responsabilidaes al gobiernu del “Principado” o amparu al español, decidimos llevar una vegada más la cuestión de la discriminación llingüística n’Asturies a la Xunión Europea, organismu del que mos costa el respetu a les llingües y cultures, asina comu el so envís proteutor pa con aquelles que, comu ye’l casu de l’asturiana, s’alcuentren minorizaes pola presión d’otres.

Nel escritu, firmáu polos eurodiputaos d’Agora Repúbliques Pernando Barrena (EHBildu) y Diana Riba (ERC) fainse unes entrugues nes que se pide a la Comisión que se posicione ante la privación del drechu a utilizar l’asturianu nel parllamentu d’Asturies carecíu por una miembru del gobiernu asturianu, asina comu énte la discriminación costante de la ciudadanía sobro l’usu de la llingua. Darréu, entrúgase-yos que midíes cuenten poner en marcha dende la Comisión pa protexer los drechos llingüísticos de la ciudadanía de la Xunión y facer cumplir la Carta de los Drechos Fundamentales de la XE.

A la fin, Andecha Astur quier remebrar qu’esta situación d’anormalidá democrática que carecemos n’Asturies tien la so causa ne imposición dende Madrid d’un estautu y una istitución –el “Principado”- ensin permitir votalu a los asturianos y nel qu’ensiquiera se reconoz la oficialidá de la nuesa llingua, situación de la que ye direutamente responsable’l PSOE n’Asturies.