El prósimu 12 d’ochobre, como vien faciéndo nos postreros 15 años, Andecha Astur cellebra’l tradicional homenaxe a la revolución asturiana d’ochobre del 34 a les 13 h. nel Cimenteriu Pando –Llangréu- delantre la tumba de Belarmino Tomás.
L’homenaxe al Pueblu Asturianu que protagonizó la hestórica revolución y que la defendió cola vida frente al exércitu de la República Española, tendrá de nueu como protagonista a la figura de Belarmino Tomás, presidente del Conseyu Soberanu y ún de los principales protagonistes de la revolución d’ochobre del 34, siendo l’interllocutor que negoció col exércitu de la República Española una rendición pautada que llueu los españoles nun respetaríen, protagonizando una represión sangrina y xabaz.
L’homenaxe a la República Obrera y Campesina d’Asturies declarada n’ochobre del 34 frente a la República Española, qu’incapaz de respetar el Drechu a Decidir del Pueblu Asturianu procedió a invadir militarmente’l nuesu país, torna ser d’especial actualidá cuando la repetición d’estes elleiciones estatales pon n’evidencia que los partíos políticos españoles y el sistema que los sustenta van de fracasu en fracasu, ensin ser quién a dar rempuesta a les aspiraciones de progresu, sociales, nin nacionales de los Pueblos del Estáu, y cuandu Andecha Astur asume presentase a estes elleiciones, sofitando asina’l determín de llibertá y progresu que comparte con otros pueblos del Estáu
Arriendes d’ello, los fechos hestóricos d’aquellos asturianos y asturianes son un exemplu perenne pal nuesu Pueblu, y una alternativa siempres presente frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.
Per otu llau, la fecha del 12 d’ochobre resulta especialmente interesante, tanto por asitiase metanes del periodu revolucionariu asturianu, como pola sinificación españolista d’esa xornada, na que l’Estáu español cellebra una “Hispanidá” que nun ye más que una xornada d’esaltación del so patrioterismu colonialista.
L’actu tendrá llugar nel Cimenteriu Pando –Llangréu- énte la tumba de Belarmino Tomás, el prósimu vienres 12 d’ochobre a les 13 hores.
