Mariu Arbesú.
La xente que me conoz sabe que participé nesta cabera campaña d’Andecha Astur a les elleiciones al congresu dando la cara y defendiendo esta candidatura y les sos propuestes de programa.
Fícelo siendo consciente de qu’Andecha ye una organización pequeña y con abondes llimitaciones, pero col convencimientu de qu’esta organización pue llegar a tener proyeición política n’Asturies a poco que consigamos implicar a más persones na mesma, ameyorar la so cadarma y medrar como organización, porque, si bien ye cierto qu’angüaño somos una organización pequeña, creo que tenemos marca, esperiencia, trayeutoria de coherencia política y, sobre too, optimismu y proyeición de futuru con propuestes creyibles p’Asturies en clave democrática, d’izquierda, soberanista, ecoloxista, feminista, de mocedá y repúblicana.
Pa mí ésta ye una nuea etapa n’Andecha Astur, ye un entamar de cero. Reincorporeme de nueu, dempués d’años de distanciamientu y unos cuantos meses de tantéu, pa ver les posibilidaes de reactivar la organización, incorporar persones y da-y un emburrión a la mesma entamando práuticamente de cero. Y, sinceramente, veo posibilidaes.
Sé perbién qu’Andecha Astur pasó por tiempos meyores y peores, más felices na so vida interna y más traumáticos, llevo dende los 18 años y pasé por diferentes fases de compromisu y de militancia y en tantos años da tiempu a ver munches coses.
Dediquéme, sobre too nos primeros años, a crear el conceyu d’Andecha Astur Noreña llegando a tener esti conceyu muncha actividá. Siempres dediqué tamién esfuercios a la parte organizativa a nivel d’Asturies y a la estaya de mocedá, asumiendo sobre too’l lliderazgu na organización xuvenil Darréu demientres unos 8 años pa dempués poner los mayores esfuerzos en Conceyu Abiertu, plataforma elleutoral de corte municipalista, y, sintiéndome siempres parte del mesmu proyectu políticu que xiraba alrodiu d’Andecha Astur, trabayé muncho na táutica de la xunidá d’aición al travies d’iniciatives como Democracia por Asturies o Lluchando pola Soberanía, amás d’otres plataformes y organizaciones sindicales como la Corriente Sindical d’Izquierdes o Paraes y Precaries d’Asturies.
Deprendí de too, de lo bono y de lo malo, pero quédome colo positivo. Andecha Astur foi pa min una escuela na que fice bones amistaes y conocí xente de la que deprendí muncho, dalgunos siguen n’Andecha y otros non, pero pongo’l güeyu’n que prestaríame volver a coincidir na militancia con toes aquelles persones que por motivos diferentes algún día s’apartaron.
Nesti sen, ta abierta la canciella y hai prau abondu pa tol mundiu que quiera volver a compartir con nós espaciu y trabayar xuntos y xuntes por esti proyectu políticu.
Nun escuendo que necesitamos xente válido, xente bono con experiencia o sin ella pero dimpuesto a ilusionase aprofitando’l aprendizaxe d’esperiencies anteriores,que de xuru aidaránmos a nun cayer n’erros del pasáu o a saber xestionar meyor les situaciones que se dan inevitablemente na xestión de cualisquier grupu humanu, organización, colleutivu o equipu de trabayu. Los conflictos son coses normales, son coses que pasen en cualquier club deportivu, comunidá de vecinos, asociación de festexos o familia pero cuando tamos falando del futuru d’Asturies, de les xeneraciones vinientes, de la supervivencia o non d’esti país, hai que baltiar cualaquier torga personal o estructural que puea poner pilancos o parar l’espoxigue del soberanismu d’izquierda como solución a la crisis de país que carecemos.
Darréu, fadré dellos apuntes y reflexones más bien rellacionaos propiamente cola campaña elleutoral y los resultaos d’Andecha Astur nesta cabera repetición d’elleiciones xenerales del día 10 de payares de 2019:
Mantuvimos resultaos y crecimos en porcentaxe.
Foron 897 les persones que votaron a Andecha Astur al congresu nestes elleiciones del 10P, lo que supón qu’en númberu de votos práuticamente s’igualare la cifra respeutu a les elecciones del 28A (909 votos) cola apreciable diferencia de qu’esti 10P medró l’abstención n’Asturies prauticamente un 7,8%. Defechu, foi Andecha Astur la única formación estraparllamentaria que subió porcentualmente fasta cuasi 7 puntos, el restu d’elles tuvieron cayíes importantes, lo que nos da una idega de lo desfavorable del contestu pa organizaciones como la nuestra.
Participamos nun tableru de xuegu dafechamente inxustu y desigual.
Andecha Astur nun compite en condiciones de igualdá col restu formaciones, cosa que, por evidente que paeza, convién recordar, puesto que nun cuntamos con financiación pública nin privada, de tal forma que nun tenemos posibilidá de facer coses básiques de campaña que sí faen los que tinen financiación pública y de los bancos como’l “mailing”, la publicidá en redes sociales, actos de campaña y presencia en los medios de comunicación de mases que direutamente censuren a Andecha Astur o eviten facer reportaxes y espublizar noticies nuestres a nun ser que sea pa criminalizar, demonizar o ridiculizar les nueses propuestes.
Ufiertamos a la sociedá asturiana una propuesta política diferente.
Electoralmente nun ye motivu d’alegría movenos nestos númberos tan distantes de los que necesitaríemos p’algamar representación institucional pero sí, conociendo la rialidá y les condiciones nes que nos presentamos, ye motivu d’arguyu y ye motivu pa llevar la tiesta alta saber que n’Asturies entá hai una organización política que fae una propuesta diferente, presentándose a les elleiciones con dignidá suficiente pa facer llegar a la xente una voz pola soberanía, la xusticia social, la democracia participativa y la república asturiana, dando a conocer el proyectu políticu d’Andecha Astur y afitando nel mapa electoral d’Asturies un preséu d’espresión del espaciu soberanista y d’izquierdes que sólo ocupa Andecha Astur, frente a la sumisión y la dependencia del restu de partidos políticos siervos o presos del dictáu de les sos organizaciones en Madrid.
Agradecemos a les persones la so participación y el so votu
Agradecemos a les persones que participaron na campaña poniendo cara y voz a la rialidá d’Asturies y agradecemos a tolos y toles votantes d’Andecha Astur qu’amosaron un exerciciu de compromisu enorme sofitando esta candidatura. Porque, nun mos engañemos, el votu a Andecha ye un votu ideolóxicu. Ye un votu de persones que saben mui bien lo que tán votando. Votar a Andecha nun ye votar Recortes Cero, al PACMA o al Partido Humanista, con tolos respetos pa estes formaciones.
Les persones que voten a Andecha saben que tán votando por camudar el sistema socioeconómicu, tán votando pola república y tán votando pola soberanía d’Asturies. Nun ye raro que VOX mos situase nel centru la diana pidiendo la illegalización de nueso.
Poro, reconocemos que los resultaos cuantitativamente nun son suficientes y qu’esti ye’l nuesu suelu elleutoral pero también camentamos que los votos a Andecha Astur nun los podemos valorar sólo en términos de cantidá sinon en términos de calidá.
Qu’Andecha Astur nun algame representación ye una espresión más de les dificultaes poles que pasa Asturies.
Tendemos a comparanos pero la nuesa rialidá nun ye la de Galicia, Cataluña ni evidentemente’l País Vascu. Asturies careció un procesu autonómicu mui diferente con un Estatutu d’Autonomía que nun votamos y onde la nuesa llingua nin si quier ye oficial y “de aquellos polvos estos lodos”.
Asturies foi nenguneada dende Madrid, maltratada y utilizada polos gobernantes y los poderes llocales que permitieron y s’arriquecieron a costal desaniciu de los sectores económicos autóctonos y de la industria, obligando a la nuesa mocedá a emigrar, d’esta forma, comu si se tratare d’un campu de destruición social, Asturies foi machucada socialmente ya robada la so autoestima. Como resultáu: sumisión, dependencia y Síndrome d’Estocolmu.
Necesidá d’organizase, xunida d’aición y formar un frente ampliu.
Aconceyada la so Xunta Executiva y la Xunta Nacional Andecha Astur, asoleyará nos próximos dies una valoración oficial, si bien esti articulu ye un adelantu personal de la llinia qu’Andecha podría plantegar darréu, proponiendo a les asturianes y asturianos al travies d’una campaña concreta la necesidá d’organizase, d’entamar calces pa la xunidá d’aicion y pa la conformación de frentes amplios. El debate ta abiertu y espero d’esta forma llegar a votantes y simpatizantes y dar resmpuesta a algunes de les cuestiones que me plantegaron algunos collacios y collacies en relación a les elleiciones, a los resultaos y al camín escoyíu por mi pa caminar políticamente, espero que con aciertu, nos próximos tiempos.
