Les recientes declaraciones d’Aurelio Martín quitando fierru a les graves emisiones contaminantes d’Arcelor suponen pasar direutamente d’una inxustificable tolerancia a la complicidá dafechu
Dende Andecha Astur consideramos que les graves declaraciones d’Aurelio Martín, conceyal de Mediu Ambiente de Xixón, tres el grave episodiu d’emisiones contaminantes d’Arcelor el pasáu llunes, afirmando que “no ha sido un problema real de contaminación para la población cercana”, supón un reblagu na política de tolerancia pa con Arcelor p’asitiase direutamente nel tarrén de la conivencia.
Xixón carez de continuo d’un severu problema de contaminación ambiente –del qu’Andecha Astur ya diera parte na Xunión Europea, y pol que la ciudá yá foi sancionada- que ta perxudicando de manera significatible la salú de la población, como espeyen los estudios mélicos rializaos nel conceyu. Les recientes, y per otru llau previsibles, emisiones qu’Arcelor achaca a otra avería nes sos recién iguaes bateríes de cok, amestaes al furrulamientu illegal del Sínter, que nun istalará’l so filtru fasta marzu, nun faen sinón agravar la situación.
Si yera persabío la falta de sensibilidá del Ayuntamientu Xixón, y el desdexamientu que fai de les sos responsabilidaes nel control medioambiental y defensa de la salú pública de los vecinos, les declaraciones del Conceyal de Mediu Ambiente y Movilidá de Xixón, restando importancia a les emisiones contaminantes d’Arcelor que demientres dos díis vienen anubriendo’l cielu xixonés, suponen una inxustificable conivencia con dicha empresa en detrimentu del drechu a la salú de los vecinos.
