La rialidá de la Sanidá Pública Asturiana

Pesia les declaraciones trunfalistes del presidente del “Principado” afirmando que “encariamos la cris sanitario dende una importante inversión”, la rialidá ye mui otra

Dientru la llinia d’autobombu y mensaxes valeros de conteníu que prautica’l presidente del “Principado”, y nunos intres nos qu’entama a ser escandalosa la inactividá ya incapacidá de la propia istitución na cris del coronavirus, Barbón vien d’afirmar que “Asturies encaria esta cris dende un puntu de partía importante n’inversión sanitario”, pretendiendo con ello xustificase por más que seya evidente la falsedá d’eses declaraciones y de que tean xugando cola salú del Pueblu Asturianu.

Nel so discursu, Barbón ufría dellos datos estadísticos positivos o que lo paecíen. Hailos, normal, malo sedría que nos caberos años dalgún índiz estadísticu sanitariu nun xorreciere anque seya por obligación, porque simplemente obliga a ello la población disperso d’Asturies, la nuesa especial xeografía y la mala rede comunicaciones que carecemos, asina comu l’avieyamientu la población (tanto por meyora de la espeutativa de vida comu pol ésodu forciáu de bona parte la mocedá).

Pero lo cierto ye que, talamente como denunciaba Andecha Astur na campaña en defensa d’una Sanidá Pública Asturiana de calidá y con recursos, ye falso que la sanidá público seya pal PSOE n’Asturies una prioridá político, y ye que, lo mesmo qu’el PP o’l PSOE a nivel estatal, coinciden n’aplicación de polítiques lliberales que respuenden, en bona parte, a los planes financieros y a les presiones polítiques de la Troika (Comisión Europea, Bancu Central Européu y Fondu Monetariu Internacional). Y eses direutrices qu’obedecen suponen siempres retayos nos sirvicios públicos esenciales, ente ellos la sanidá (redución del papel públicu na prestación de sirvicios sanitarios, recorte plantilles, mengües salariales, copagos, fixación de tases por sirvicios mélicos, atribución a la enfermería de competencies méliques…). Ye tan ñidio, qu’hai pocos díes la Organización Mundial de la Salú viose obligá a reconocer públicamente que “los recortes sanitarios son una de les causes del andanciu’l coronavirus”.

Ello asina, dende Andecha Astur consideramos que nun puen permitise les manipulaciones de Barbón queriendo dar por bona la política sanitario qu’aplica’l PSOE dende’l “Principado”, y apurrimos una riestra de datos qu’espeyen cuala ye la xestión que vienen faciendo de la Sanidá Pública Asturiana:

• Los presupuestos de la Conseyería Sanidá pal 2010 (cuandu’l “honorable” Areces) otorgaron 30 millones d’euros menos que l’añu anterior, teniendo en cuenta qu’a los de 2009 hebio d’añadir dempués urxentemente 191 millones € más porque nun algamaba.
• En 2015 la Organización Mélica Colexal española yá alvirtió de que la calidá del sirviciu sanitariu públicu “nun yera aceutable” y calificó de “fuin” al FMI.
• En 2016 los diabéticos asturianos denunciaron que, por aforrar, la Conseyería Sanidá dexare de facilitar les aguyes pa insulina qu’avezaba, de la calidá necesario, y entamaron a dar aguyes “low cost” que prevocaben dolor y renegrones. A ca enfermu obligáronlu a gastar unos 400 € al añu n’aguyes afayaíces.
• En 2016 el gobiernu “socialista” del PSOE derivó un 6’1 % del gastu sanitariu a conciertos cola sanidá privao: 101 millones.
• Ente 2007 y 2016 el gastu destináu a conciertos cola sanidá privao xorreció con una tasa del 0’7% añal.
• En 2016 el gobiernu asturianu dedicó 2.215 millones € a gastu sanitariu, d’ellos sólo 1.540 millones € se gastaron en sanidá público, el restu foi parar a manes d’empreses de sanidá privao (centros concertaos, tresporte sanitariu, hemodiálisis y otros gastos).
• En 2019 PSOE, IU y Podemos acomuñaron p’aprebar los presupuestos d’Asturies d’esi añu. Sicasí, foron unos presupuestos ruinos, comu amosaron les movilizaciones qu’en varies llocalidaes asturianes fexeron colleutivos de profesionales sanitarios, sindicatos, pensionistes y vecinos escontra los recortes sanitarios que pa ellos yeren evidentes: falta presonal sanitario, llistes d’espera, perda de calidá asistencial, reconversión del modelu d’atención primario pa tresformalu nun sistema d’atención ambulatorio de baxa calidá…
• N’avientu de 2019 el conseyeru Sanidá, Pablo Ignacio Fernández Muñiz, anunciaba un presupuestu sanitariu pal 2020 “eficaz, apiegáu a la rialidá, con optimización de recursos” y destináu a la eficacia, eficiencia y calidá. La cris sanitario del coronavirus dexó ñidio que, nin política nin presupuestariamente, el gobiernu asturianu nun taba preparáu pa ufrir a la ciudadanía los sirvicios sanitarios necesarios, nun afondamos más.
• Nel 2019 el SESPA reconoció públicamente que la falta mélicos n’Asturies yera enforma grave, polo que se vio obligáu a tomar midíes esceicionales pa garantizar l’atención sanitario en tol país asturianu, sobro too nes sos fasteres ocidental y oriental. Ye más, nun BOPA de xunu de 2019, la Conseyería Sanidá reconocía que tien “fasteres sanitaries de difícil cobertura”, ensin profesionales de la sanidá.
• En 2019 hebio 39 mélicos asturianos qu’emigraron pa trabayar fora d’esti Estáu borbónicu. Nos caberos diez años foron 400 mélicos asturianos los que tomaron esi camín, sólo’l 65% d’ellos con un contratu llaboral na man.
• En 2019 diéronse cites d’atención primario a un mes vista, por problemes de xestión del presonal (baxes, tresllaos, vacancies…). Nesa fecha’l Centru Salú Severo Ochoa (Xixón) tenía pesllaes 39 consultes de 165 (el 23’6%) y nel branu calculábase qu’habría un 25% de consultes pesllaes. Nesti añu l’Hospital Carmen y Severo Ochoa (Cangas del Narcea) tuvo cuatru meses ensin nefrólogu y tamién varios meses ensin cardiólogu, urólogu y otorrinolaringólogu. Nel Hospital Valle del Nalón (Llangréu) les cites de cardioloxía llevaron un retrasu de cuatru meses, por nun tener cubierta denguna de les dos places de la especialidá.
• N’Asturies el seutor hospitalariu priváu representa’l 64% de los hospitales y el 27% de les cames.
• N’Asturies un terciu de los equipamientos d’alta teunoloxía atópase en centros privaos, por exemplu’l 67% de los PET (tomografíes por emisión de positrones) o’l 50% de los aceleraores de partícules.
• Los retayos na sanidá pública asturiana nes caberes décades notáronse nel déficit de presonal sanitario de toa triba (méliques, enfermeros, ausiliares, celaores…), llistes d’espera desesperantes, pieslle nel branu de plantes hospitalaries y centros de salú (magar que la población se multiplica), aumentu contratos con empreses sanitaries privaes, multiplicación del númberu cames por cuartu, non cobertura de places vacantes (baxes, vacaciones, tresllaos, xubilaciones), redución del papel públicu na prestación de sirvicios sanitarios, copagos farmacéuticos, escasa disponibilidá de recursos d’alta teunoloxía, falta intencionao de control en materia farmacéutico, infrautilización de la Facultá de Melecina, places hospitalaries de formación MIR escases, probe inversión n’investigación, ruina ufierta d’emplegu públicu nel seutor… En resume: El PSOE vieno vaciando presupuestariamente la sanidá público asturiano.

Amás de nos retayos presupuestarios, pa diagnosticar la situación de la sanidá público asturiano hai de reparar tamién nos niveles de calidá democrático, tresparencia y eficacia con que se xestionen talos presupuestos sanitarios. Y nesti ámbetu, tamién demientres décades, el gobiernu asturianu tien más que pa callar que pa cuntar.

• En setiembre de 2019 el Tribunal Supremu espublizó la so sentencia nel casu Riopedre-PSOE. Nella consideró acreitao que nel tiempu en qu’Areces presidió’l gobiernu “quedó sostancialmente corrompíu’l procedimientu d’axudicación de contratos de suministru y d’obres” d’esti gobiernu, llantando “de facto un sistema d’axudicación de los contratos conveníos cola Alministración qu’afeutaba a tol sistema de la Comunidá Autónoma y non sólo al padremuñu d’ésta”, pola comisión de delitos de cohechu, malversación, prevaricación y falsedá, polo que, en términos políticos, puen definise aquellos años comu de corrución sistémico. Ési foi l’heriedu qu’Areces dexó a Javiér Fernández y ésti a Barbón.
• En 2019 la Sindicatura Cuentes espublizó’l so informe sobro la merca fecha pol SESPA de melecines pa la rede hospitalario público nos años 2017 y 2018. La conclusión yera de xulgáu de guardia: El sistema de merques del SESPA yera illegal, “de manera sinificativa y xeneralizá”. Pero entá había más… El SESPA presentó a la Sindicatura información qu’ésta calificó comu “non fiatible”. Mazcaritáronse merques con conceutos xenéricos pa torgar la identificación de lo mercao. Superóse con muncho la formalización de contratos menores incumpliendo la Llei de Contratos del Seutor Públicu. Los contratos menores illegales representaron el 29’73% en 2017 (39’2 millones) y el 25’34% en 2018 (30’56 millones). Esmigayáronse lo que deberíen ser grandes contratos centralizaos de merca melecines en munchos contratos menores, pa escamotiar controles más firmes. Topáronse fatures ensin númberu espediente del pidíu y ensin el preciu unitariu del melicamentu.
• En marzu de 2020 la Fiscalía Superior del “Principado”, por pidíu d’Andecha Astur, abrió dilixencies pa investigar posibles delitos nos fechos recoyíos nel informe de Sindicatura Cuentes, ente ellos:
  • El SESPA ñegóse a informar sobro los contratos fechos nel exerciciu 2018 y a facilitar la rellación de contratos menores, incumpliendo la Llei de Contratos del Seutor Públicu.
  • Na cuasi totalidá de los contratos analizaos l’alministración sanitario nun fizo un siguimientu de la execución del contratu, renunciando a controlar la calidá’l sirviciu o materiales contrataos, asina comu’l cumplimientu de les obligaciones del contratista y les posibles responsabilidaes penales derivaes.
  • La Conseyería de Sanidá otorgó nominativamente’l 69’94% de les sovenciones, cuandu la concesión direuta tenía de ser llegalmente una esceición y lo normal debiere ser la concurrencia competitivo a les sovenciones.

Ésta ye la radiografía de la política sanitario del PSOE n’Asturies (la del PP sedría un retratu d’ésta).

Sicasí, Barbón remana los medios de comunicación apeciendo como si viviere nun permanente “reality show” nel qu’inventa una rialidá paralela en cuentes de responder a les necesidaes de la sociedá asturiana. Por eso nun quier falar de garantizar que la salú nun ye un negociu, de planificar la plantía sanitario, d’ameyorar el tratu al presonal, de dar estabilidá llaboral, de reconocer meyores retributives y sociales, de definir les places de difícil cobertura, de desaniciar les llistes d’espera, del control públicu de los recursos farmacéuticos y de los sos precios, del entamu d’una industria farmacolóxica pública asturiana, de multiplicar les places de melecina, los puestos hospitalarios de formación MIR, de regular les convocatories d’emplegu públicu na sanidá, d’aumentar el presupuestu sanitariu, d’ameyorar la inversión n’investigación sanitario y teunolóxico… Non, de la política sanitario p’algamar una Sanidá Pública Asturiana de calidá y con recursos, d’eso Barbón y el PSOE nun quien falar.