Sal alantre la propuesta fecha por Andecha Astur, de recostruyir esti horru hestóricu en base a los materiales restantes del so esbarrumbu, siguiendo estrictos criterios científicos y profesionales
Trátase de tou un trunfu, consecuencia de la propuesta presentada por Andecha Astur a la Presidencia’l Gobiernu d’Asturies, a la Conseyería de Cultura y al alcalde d’Amieva, na qu’ente otres custiones pidíase la recostruición d’esti horru, propuesta qu’asumió’l Conseyu de Padremuñu encamentando la reconstruición utilizando les pieces reaprovechables.
Por más que llevantar un horru cuandu cai seya una práutica avezada n’Asturies, lo cierto ye que trátase de la primer vegada que dende’l “Principado” s’encamienta llevar alantre esta práutica, de tala miente que fasta agora ca horru hestóricu baltiáu, esaniciábase.
L’horru de Vis, incluyíu nel inventariu de Padremuñu Cultural d’Asturies y protexíu pola Llei del Padremuñu Cultural (2001) y pol so Reglamentu (2015) esbarrumbó’l 4 de xunu consecuncia del desdexamientu de los dueños del horru, l’Alcalde d’Amieva, la Conseyera de Cultura, Política Llingüística y Turismu, el Direutor Xeneral de Cultura y Padremuñu y el Xefe’l Sirviciu de Proteición, Conservación y Difusión del Padremuñu Cultural qu’incumplieron gravemente les sos obligaciones llegales en materia de conservación del padremuñu asturianu.
Ello asina, Andecha Astur desixirá les debíes responsabilidaes polítiques y llegales, y fadrá un seguimientu del encamientu del Conseyu de Padremuñu, pa comprobar que bramente torna llevantase l’horru de Vis, tou un símbolu de comu hai que defender el padremuñu y la identidá cultural asturiana frente al desdexamientu y minusvaloración istitucional.
