Andecha Astur desixe al Gobiernu Asturianu que garantice un plande viabilidá pa Vauste
Denuncia la intervención de la trama carbonífera d’El Musel y la posibilidá de que responsables políticos gueten puertes xiratories
P’Andecha Astur ye prioritario caltener los 130 puestos de trabayu de Vauste. Pa ello’l Gobiernu de Barbón tien d’abandonar la so actitú cómpliz nel conflictu y dirixir el camín haza un plan de viabilidá pa la empresa.
Nesti conflictu’l Gobiernu asturianu tien antecedentes. En 2016 avaló la venta de Vauste (antigua Tenneco y Monroe) al fondu utre d’inversión Quantum Capital Partners, que se compromedió a dinamizala. Y en 2019 Quantum vendió Vauste al fondu DSA, que prometió lo mesmo cuandu mercó la empresa al traviés de la so marca Natural Mining Resources (NMR).
Sicasí tolos compromisos alquiríos polos fondos Quantum y DSA (inversiones, cartera clientes…) foron incumplíos sistemáticamente, cola complicidá del Gobiernu asturianu. Remembramos el papel vergoñosu del conseyeru Isaac Pola, cuandu en 2019 defendía la xestión de la empresa, falaba de “ésitu colleutivu”, ñegaba dafechu’l riesgu de desllocalización y perafitaba que la so cris yera circustancial.
Agora NMR (del fondu DSA) presenta un concursu voluntariu d’acredores, que, si nun ye aceutáu, lleva a Vauste a la lliquidación. Pero nel so plan de viabilidá NMR plantega dispidir ente 40 y 60 trabayaores de Vauste y menguar los sueldos nun 20%.
Y la rempuesta del actual Conseyeru d’Industria, Enrique Fernández, ye del mesmu nivel cómpliz que la de Isaac Pola: aselar a los trabayaores, confiar na viabilidá qu’afirma la empresa, ñegar un pieslle tapecíu y asegurar qu’ésta tien futuru gracies a les midíes qu’el gobiernu PSOE-Podemos toma en Madrid pal seutor l’automoción.
Da vergoña ayeno sintir cómu’l Conseyeru d’Industria (PSOE) remembra al diputáu Ripa (Podemos) que’l gobiernu español que dambos comparten yá ta faciendo lo posible por salvar al seutor y a Vauste, cuandu dambos saben qu’esa política común que tienen ye ineficaz y que lo que pasa con Vauste ye “otra guerra”.
Lo qu’asocede con Vauste ye que, dende hai unos años, ye vítima d’un procesu acallentáu y consintíu de pieslle y desllocalización de la inversión, un procesu complexu porque tolos implicaos s’alcuerden de que si Vauste esiste entá ye porque una resistencia modélica de los trabayaores torgó que la multinacional norteamericana Tenneco pesllare la empresa en 2013. Ye un procesu de ruina empresarial consintíu pol Gobiernu d’Asturies, amparáu pola FADE y sospechosamente mal contestáu polos sindicatos españoles (CCOO, UGT y USO).
Pa ello’l permitióse que tomare la propiedá de Vauste una man lliquidaora: la empresa NMR, una empresa que pertenez a la tenebrosa trama carbonífera asitiá n’El Musel, daqué que curiosamente Podemos nun denuncia.
NMR ye una empresa a la que l’Autoridá Portuaria de Xixón (baxo control de los gobiernos español y asturianu, la mesma que puxa por privatizar la empresa pública EBHI) dexó entrar n’El Musel pela puerte grande, cediéndo-y 10.000 metros cuadraos pa cribar carbón rusu, colombianu…, mecelo con escories y vendelo sobro too a térmiques marroquís. NMR tien domiciliu en Madrid y la sola esperiencia del alministraor únicu foi ser xixilante nuna mina asturiana de carbón, polo qu’esisten sospeches de que pudiere ser un testaferru. NMR ye una les posibles beneficiaries d’una cris por descapitalización n’EBHI que llevase a esta empresa pública de la estiba a la privatización, porque asina tendría una plantilla propia d’estibaores.
El Gobiernu asturianu y los grandes intereses del capital tán permitiendo qu’empreses sospechoses de la trama carbonífera muevan n’El Musel más carbón foriato que les mines asturianes nos sos bonos años. Poro, hai que tar sollertes por si dalgún miembru cimeru de l’Autoridá Portuaria o del Gobiernu d’Asturies acaba, gracies a les puertes xiratories, en dalguna empresa privá rellacioná col casu Vauste.
