La concluxón ye obligada: hai que faer más Asturies, más país, dende un frente ampliu
Andecha Astur quier compartir col Pueblu Asturianu les reflexones que fexo tres les elleiciones nacionales cellebraes el 12 de xunetu en Galicia y Euskal Herria.
En primer llugar treslladamos una felicitación fonda y vibrante a les compañeres d’EH Bildu y del BNG polos sos perbonos resultaos elleutorales y, en xeneral a los pueblos de Galicia y Euskal Herria pol compromisu amosáu en defender el drechu a decidir el so futuru. Dambes organizaciones polítiques son compañeres d’Andecha Astur na coalición Agora Repúbliques, que se presentó a les caberes elleiciones estatales y europees.
Magar la renovación de la mayoría asoluta del PP en Galicia, alviértese una tendencia de los partíos españoles tradicionales (PSOE y PP) a caltener cuasi los mesmos resultaos qu’en 2016 o a empeoralos. Mentantu que Podemos, tres la so incorporación al gobiernu español arrenunciando a aquella promesa metafórica de “conquistar los cielos”, acaba de pagar el duru preciu la desapaición en Galicia y el de la perda de más del 50% de representación n’Euskal Herria.
Agora bien, l’aspeutu bramente sinificativu nestes elleiciones ye que se comprebó la esistencia d’una tendencia firme de los partíos nacionaliegos a xorrecer en representatividá nos sos parllamentos. La meyora resultaos d’EH Bildu y BNG ye incustionable. Si xuncimos esti datu coles espeutatives de votos de la esquierda nacionaliega catalana pa les sos prósimes elleiciones, comprébase qu’hai nel elleutoráu una tendencia xorreciente a confiar ca vegá más nes opciones que lluchen por soluciones sociales, llaborales, económiques, medioambientales, culturales… dende la reconocencia y el compromisu progresista col propiu país.
Ello ye, les opciones polítiques estatalistes tán viéndose ñidiamente superaes por aquelles otres que defenden el drechu de los pueblos del estáu español a decidir con llibertá’l so futuru, exerciendo la soberanía pa escoyer les soluciones polítiques que-yos resulten más afayaíces.
Ye cierto que los resultaos elleutorales de 2016 dibuxaben una rialidá estremá, na qu’una parte sinificativa del elleutoráu prebó a votar la propuesta posibilista de Podemos: promeses d’una rápida revolución social y política, respetando la identidá de los pueblos sometíos pol estatalismu borbónicu que representen PSOE-PP. Pero esi elleutoráu necesitó pocu tiempu pa comprebar cómu los hipercríticos cola castra se xuncíen a ella, aparcando cualisquier plantegamientu de ruptura col réxime borbónicu español, incorporándose al so gobiernu y escaeciendo dafechu’l conflictu de les clases y los pueblos primíos pola corona que valta embaxu la costitución española. La gran mayoría del elleutoráu gallegu y vascu qu’en 2016 s’arriesgó a confiar el so votu al suañu del cambéu rápidu prometíu por Podemos, espertó nel intre y dafechu, recuperando nestes elleiciones el so compromisu con proyeutos de progresu dende la reconocencia de la soberanía propio de los pueblos.
La tendencia que se compreba en Galicia y Euskal Herria, la tendencia que se barrunta en Cataluya, ye tamién motivu d’esperanza pal futuru d’Asturies. Les soluciones pa la nuesa patria quería nin tán nin vienen de Madrid. Les soluciones valibles pa los nuesos problemes van ser aquelles qu’equí faigamos a comuña toles asturianes y asturianos. Tenemos de reconocemos comu país, tenemos de defender el nuesu drechu a escoyer equí los oxetivos y les soluciones que necesita Asturies. Ési ye’l camín nel que con coherencia, dende siempres trabayen les muyeres y homes d’Andecha Astur, col enfotu permanente de defender Asturies pa que siga siendo la tierra na que les asturianes y asturianos puedan y quieran afitar los sos proyeutos de vida y llibertaes.
N’Andecha Astur trabayamos esforciámente pa qu’Asturies seya parte d’esi camín esperanzaor que s’abre énte los pueblos del estáu español. Poro, perafitamos el compromisu qu’anunciemos apocayá: andechar con toles asturianes y asturianos que-yos pruya pa encadarmar un frente ampliu del soberanismu asturianu al rodiu d’estos puntos mínimos:
- Superación del Estatutu d’Autonomía impuestu.
- Reconocencia la oficialidá del asturianu.
- Acabu de les polítiques coles que’l Reinu d’España agrede Asturies en tolos ámbetos (llaboral, mediuambiental, demográficu, identitariu, enerxéticu, presupuestariu, industrial, turísticu, comunicaciones…).
Comu se ve, trátase d’unos puntos mínimos camentaos pa xuncir voluntaes y esfuercios, ensin arrenunciar a la coherencia y al compromisu colo que somos, de mou que permitan aperiar nel país les soluciones qu’Asturies necesita.
Pol futuru d’Asturies, perseguimos comprometíos a falar con toes y toos d’esta propuesta de frente ampliu asturianu.
