Esti sábadu 22 d’Agostu, Andecha Astur convoca nel Puertu Tarna el tradicional actu d’homenaxe a la Declaración pola que’l Conseyu d’Asturies y Llión proclamábase Soberanu ya independizábase a tolos efeutos de la República Española.
Nunos intres nos que’l movimientu soberanista y antimonárquicu s’afaya especialmente dinámicu, con movilizaciones de toa triba baxo’l llema “Asturies Nun Tien Rei”, Andecha Astur reclama’l Conseyu Soberanu como la postrer istitución democrática del Pueblu Asturianu, y la soberanía como un drechu inrenunciable ya imprescindible p’afitar el nuesu futuru como Pueblu, perafitándose na reivindicación de la República Asturiana.
L’actu tendrá dos partes estremaes: A les 10:00 procederáse a xubir a les trincheres de L’Abidular dende onde l’exércitu del Conseyu Soberanu defendió’l país frente a les tropes franquistes, y a les 13:30 delantre’l monumentu que fai alcordanza d’esta hestórica declaración del 24 d’agostu de 1937, aniciu d’una auténtica República Asturiana.
Pa facilitar la participación, esti añu cuntaráse con autobuses, siendo preciso reservar plaza bien per corréu lletrónicu: andechainfo@gmail.com o al teléfonu 684 644 711
Con esti actu homenaxease la hestórica declaración, fecha’l 24 d’agostu de 1937, pola que’l Conseyu d’Asturies y Llión declarábase soberanu ya independiente de la República española:
«Artículul 1.- El Conseyu Interprovincial d’Asturies y Lleón, de magar la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdición y a elli queden dafechamente sometíes toles xurisdiciones y muerganismos civiles y militares que foncionen o vaigan foncionar de secute dientru’l mentáu territoriu.»
Esta proclamación soberanista permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, pero enxamás nun cuntó cola aprebación de la República española, que llegó a considerar un alliviu l’acupación d’Asturies poles tropes facistes énte la posibilidá de qu’Asturies fuere reconocíainternacionalmente como nación independiente, talo como solicitó Belarmino Tomás, Presidente del Conseyu Soberanu, a la Sociedá de Naciones.
La falsa transición política cola que continuó’l franquismu non solo nun permitió recuperar esta auténtica istitución d’autogobiernu, sinon qu’impunxo dende Madrid –ensin que’l Pueblu Asturianu pudiere votalo- un “Principado” y un Estatutu descontestualizáu hestoricamente y sociolóxicamente ayenu a la sociedá asturiana, condergándomos a la situación de colonialismu que carecemos anguañu.
