Barbón, Berta Piñán, dos cargos de la Conseyería, l’Alcalde d’Amieva y los dueños l’horru, acusaos de presuntos delitos
El 4 xunu, tres un llargu procesu de ruina estructural, esbarrumbaba una ayalga arquiteutónica astur: l’Horru de Vis (Amieva), incluyíu nel Inventariu de Padremuñu Cultural d’Asturies.
Esiste una bayurosa normativa qu’obligaba a los dueños, a la Casa Conceyu y al Gobiernu d’Asturies a protexer esi bien: Llei 1/2002, de 6 de marzu, del Padremuñu Cultural; Decretu 20/2015, de 25 de marzu, pol que s’apreba’l reglamentu de desendolcu de la Llei 1/202, de 6 de marzu, del Padremuñu Cultural; Resolución de 4 de xunetu de 2018, de la Conseyería d’Educación y Cultura, pola que se fina l’espediente pa la inclusión nel Inventariu de Padremuñu Cultural d’Asturies del Horru de Vis y otros 38 bienes patrimoniales del conceyu d’Amieva.
Poro, nel naquel momentu, Andecha Astur empobinóse al presidente’l Gobiernu d’Asturies y a la Conseyera de Cultura pa qu’entamaren les necesaries investigaciones sobro la perda l’Horru de Vis, pidiendo que ficieren públicos informes téunicos, actes d’ispeición, midíes cautelares y urxentes tomaes, órdenes d’execución y otros documentos rellacionaos col siguimientu ya ispeición del mentáu bien, asina comu determinando quiénes yeren los responsables l’esbarrumbu.
Dende entós el Gobiernu d’Asturies nun tomó denguna iniciativa pa esclariar el fechu denunciáu, nin amosó intención dala de facelo. Sólo aceutó públicamente la propuesta d’Andecha Astur de recostruyir l’horru, compromisu qu’entá nun se cumplió.
Lo mesmo que la Conseyera de Cultural incumplió la promesa, fecha depués na Xunta Xeneral, d’aprebar una nuea normativa que meyorase la identificación y proteición d’horros y paneres, incluyendo aídes a los propietarios.
Andecha Astur nun pue regalar más tiempu al Gobiernu d’Asturies pa que siga mintiendo, faciendo sólo progapanda y escurriendo’l bultu les sos responsabilidaes polítiques, mentantu’l padremuñu asturianu se va perdiendo de mou irremediable.
Andecha Astur tampocu va regalar más tiempu a los grupos parllamentarios de la Xunta Xeneral, que cacarexaron abondo cuandu cayó l’horru pero nin obligaron a Barbón a correxir la so política cultural antiasturiana nin desixeron les obligaes responsabilidaes polítiques y llegales.
Andecha Astur entiende que la proteición del padremuñu cultural d’Asturies nun pue esperar más. Poro, presentó énte la Fiscalía Superior una denuncia sobro los fechos asocedíos en Vis.
Andecha Astur denuncia a los dueños del horru, a José Félix Fernández Fernández (Alcalde d’Amieva), a Berta Piñán Suárez (Conseyera de Cultura, Política Llingüística y Turismu), a Pablo León Gasalla (Direutor Xeneral de Cultura y Padremuñu) y a Enrique Escudero Fernández (Xefe’l Sirviciu Proteición, Caltenimientu y Difusión del Padremuñu Cultural).
Andecha Astur creye que toos ellos son culpables del esbarrumbu por ruina del Horru de Vis y, comu talos, presuntos responsables de faltes o delitos en materia de caltenimientu del padremuñu cultural d’Asturies, colos agravantes de l’allarma social prevocao y, na mayoría los casos, de tratase d’autoridaes y foncionarios públicos.
Andecha Astur pide que la Fiscalía investigue a los propietarios del Horru de Vis por presuntu incumplimientu de les sos obligaciones de caltener esi bien protexíu. Tamién al Alcalde d’Amieva por si nun incluyere l’Horru de Vis nel obligáu catálogu urbanísticu de bienes inmuebles esistentes nel conceyu que presenten interés hestóricu, artísticu, etnográficu, industrial o de cualisquier otra ñatura cultural.
Pide, amás, que s’investigue a les autoridaes y funcionarios denunciaos por si nun cumplieren coles sos obligaciones d’actividá ispeutora en materia de padremuñu cultural, de llevantamientu d’actes d’ispeición, d’emisión d’informes sol estáu de caltenimientu de los bienes protexíos, de propuesta d’adopción de midíes urxentes específiques énte posibles menacies o destruición de bienes protexíos, de propuesta d’adopción de midíes cautelares pal caltenimientu de bienes protexíos, asina comu del so deber xeneral de protexer y caltener l’Horru de Vis. Tamién por si incumplieren les sos obligaciones de dictar órdenes d’execución pa obligar a los propietarios del horru a realizar les actuaciones que yeren mester pa caltener un bien protexíu.
Andecha Astur solicita de la Fiscalía que considere si los presuntos culpables tán obligaos a indemnizar polos daños y perxuicios causaos, por causa de dolu, neglixencia o morosidá, o por contravenir les sos obligaciones. Igualmente pide a la Fiscalía se posicione, especialmente, sobro si les autoridaes y foncionarios denunciaos nun cometieron faltes contemplaes nel réxime disciplinariu de los emplegaos públicos, por notoriu incumplimientu de les fonciones esenciales propies del puestu de trabayu o fonciones que tienen encomendaes, considerando llegalmente cualisquier responsabilidá civil o penal que pudiere esistir.
En tou casu, y a la espera’l determín que tome la Fiscalía Superior, Andecha Astur señala que ye clara la responsabilidá política de los denunciaos porque toos ellos persabíen que l’Horru de Vis atopábase nuna situación precaria, prósima a la ruina y necesitá d’aiciones conservaores d’urxencia, comu quedó rexistrao nos años 2016-18 nel procesu d’iscrición del horru nel Inventariu de Padremuñu Cultural d’Asturies.
Pa finar, Andecha Astur denuncia que lo asocedío col Horru de Vis ye’l vivu exemplu de lo que representa la política cultural del PSOE n’Asturies: reconocencia nominal de la bayura cultural, renuncia a la intenvención al so favor, inhibición na so proteición, ocultamientu de la so responsabilidá política y llegal y, comu oxetivu final, guetar la perda la identidá cultural asturiana por llarga ruina y desatención, ye dicir un procesu inducíu de xenocidiu cultural.
