El voceru de la Estaya Llaboral d’Andecha Astur, denuncia que la situación xenerada pol andanciu favorez la desllocalización d’empreses, los despidos y la precariedá mentes el «Principado» mira pa otru llau.
El recién preslle patronal d’Arcelor mandando a casa 320 trabayaores foi un avisu de lo que ta por venir, los 60 despidos de Vauste, los 110 despidos plantegaos por Imasa, el preslle d’Alcoa, o la situación a la que tan llevando a EHBI cara al so desaniciu, son espresiones del aceleramientu del procesu de desindustrialización que se vien aplicando n’Asturies, y qu’agora mesmo, cola prioridá social ya informativa del Covid tan dexándose nun segundu planu.
Nesi sen, ye inxustificable la indiferencia ya incapacidá del “Principado”, que nun solo ye cómpliz de les polítiques del Estáu español p’Asturies, responsables de la destruición del texíu socio-económicu asturianu, sinon tamién d’un modelu d’esplotación llaboral que subvenciona, pero que nun regula nin controla.
Poro, dende Andecha Astur facemos un llamamientu a la defensa del puestu de trabayu y d’unes condiciones llaborales dignes, y a desixir al “Principado” qu’asuma les sos responsabilidaes y asuma la defensa de la industria asturiana y a los sos trabayaores, perriba de la so reinal sumisión a los mandatos del gobiernu central.
