Son unos presupuestos continuistes que nun suponen dengún avance no político, económico nin social y que confirmen la sumisión absoluta d’IU y Podemos, dexando claro que l’alternativa política p’Asturies ta agora mesmo fora la Xunta Xeneral
Anque’l “Principado” pretenda vender los presupuestos presentaos va poco pola Xunta Xeneral comu “los más espansivos” pola so mayor dotación económica, nun dexa de ser un incrementu impuestu poles actuales circustancies, que ye, amás, insuficiente, yá que’n realidá nun respuende a les necesidades xeneraes pol andanciu. De fechu, en función de l’actual demanda, son unos presupuestos entá más probes que los anteriores.
Sicasí, lo más grave nun ye que nun se correspuendan coles necesidaes inmensamente superiores del Pueblu Asturianu nesti intre hestóricu, sinón que son unos presupuestos continuistes que, magar el xorrecimientu cuantitativu, nun impliquen denguna meyora cualitativa, dexando a Asturies na mesma situación de dependencia, servilismu y desaniciu del texíu socioeconómicu.
Dicimos que son continuistes porque, magar l’incrementu presupuestariu, nun suponen dengún avance nin no político, nin no social nin no económico.
No político, porque nun dan nin un solu pasu nel camín de superar l’actual marcu políticu, con un estatutu d’autonomía impuestu, que los asturianos nun pudimos votar, y que mos dexa nuna situación de ciudadanos de tercera, dependientes siempres d’un Estáu español que mos sigue diciendo cómu y en qué gastar les perres y que sigue vulnerando drechos fundamentales, comu ye mesmamente’l casu los drechos llingüísticos.
No social, porque nun permiten facer frente al andanciu nin a les sos consecuencies económiques y llaborales sobre la población, nin muncho menos permiten que los servicios públicos superen los efeutos de la llarga y nefasta xestión d’Areces y de sucesivos gobiernos del PSOE.
No económico, porque nun ufren denguna meyora que permita recostruyir el tan maltratáu texíu socioeconómicu asturianu, nin encarar el futuru con opciones reales de recuperanza, sinón que nos caltién nel camín marcáu poles polítiques de les caberes décades que, comu sabemos, suponen l’imperiu del llibre mercáu, el poder de gran capital y la progresible redución de drechos y rentes de la clas trabayaora.
Estos presupuestos nun respuenden a les necesidaes del Pueblu Asturianu, sinón que suponen apautase pa xestionar la decadencia.
Podemos ya IU sofítenlos vergoñoasmente, ensin desixir dengún tipu de contrapartía pública –conocía- nin algamar dengún tipu de porgüeyu pal conxuntu del Pueblu Asturianu. Ello representa una rendición ensin precedentes pela so parte y una renuncia esplícita a ser l’alternativa política qu’Asturies necesita con urxencia, amosando qu’esta alternativa tien de venir de fora la Xunta Xeneral.
