Ente otros méritos recueye que «Abu Dabi amuesa un sentimientu talu d’asturianía que ye igual al sentimientu que tien el Pueblu Asturianu de ser un “principado” español».
La propuesta, presentada énte la Fundación Princesa d’Asturies faise como rempuesta a la farsa que representa’l réxime de los Borbones, a la “democracia española” qu’impunxo a Asturies la figura del “Principado”, a los premios “Princesa d’Asturies” colos qu’añalmente s’ofiende a asturianos y asturianes, y la burlla humillante que representa p’Asturies el concursu franquista de “Pueblo ejemplar”
Ente los méritos que recueye Andecha Mocedá na so irónica propuesta del l’Emiratu d’Abu Dabi, a Pueblu Exemplar 2021 recuéyense:
“La candidatura que se presenta axunta, especialmente, dos méritos bien valibles qu’apaecen ente los consideraos na convocatoria, a saber:
- Abu Dabi ye un llugar que destaca polos sos manifestamientos de solidaridá sobresalientes, comu l’acoyía y proteición del ciudadanu español Juan Carlos I de Borbón, qu’abandonó apriesa l’Estáu español tres facese públicos dalgunos de los sos enguedeyos financieros y fiscales.
- Abu Dabi ye tamién un llugar qu’afala davezu iniciatives d’impulsu económicu y social, comu amuesa al sofitar de contino les aiciones que, dende aquel Emiratu, protagoniza’l ciudadanu español Juan Carlos I de Borbón pa caltener y ameyorar los sos negocios.
- Que los dirixentes y habitantes d’Abu Dabi carauterícense por un tipismu meritoriu, compuestu principalmente de tres rasgos notorios:
- El so calter campechanu.
- La so facilidá pa enllenase d’arguyu y satisfación.
- La importancia que na so fraseoloxía tien la espresión “La xusticia ye igual pa toos”.
Asina mesmo, pídise a la Fundación “Princesa de Asturias” “que nun se considere causa d’esclusión d’esta candidatura’l fechu de qu’Abu Dabi s’allugue a 6.000 kilómetros d’Asturies, porque tien de valorase, perriba too, que la población d’Abu Dabi amuesa un sentimientu talu d’asturianía que ye igual al sentimientu que tien el Pueblu Asturianu de ser un “principado” español”.
