Andecha Astur desixe al «Principado» la ellaboración d’un llistáu completu y un plan de recuperanza de los bienes inmuebles asturianos inmatriculaos pola Ilesa católica. De nun ser asina, el gobierno del «Principado» sedríe cómpliz del procesu d’aprobación indebía por inmatriculaciones protagonizáu pola Ilesia católica n’Asturies
El Gobiernu español dio a conocer apocayá un llistáu de bienes inmuebles asitiaos n’Asturies y que foron indebíamente inmatriculaos pola Ilesia católica, lo que valió pa reabrir temporalmente un pequeñu alderique social sobro la custión que, pasáu dalgún tiempu, abocanará comu asocedió otres vegaes.
Énte esta rialidá Andecha Astur, que yá denunciara ente la Unesco l’apropiación del prerrománicu asturianu, y protagonizó estremaes iniciatives al respeutu, quier esclariar dalgunos puntos:
- El procesu d’apropiación indebía mediante inmatriculaciones que protagonizó la Ilesia católica n’Asturies ye d’una gravedá tremenda, pos indicios razonables permiten sospechar que la cifra d’inmuebles inmatriculaos ye’l triple de la reconocía pol gobiernu español (sólo 549), incluyendo la mayor parte de los monumentos del Arte Asturianu y fasta bienes inmuebles que nun teníen usu nin vinculación relixosa denguna.
- El que los llistaos de bienes inmatriculaos seyan siempre enguedeyaos ya incompletos, débese tanto a la culposa política escurantista que caltién la Ilesia católica pa que nun se conozan les sos apropiaciones, comu a la complicidá del Gobiernu asturianu y del español cola Ilesia católica, cola que nun quieren confrontrar de manera dala.
- Asturies nun pue permitise qu’una tema d’esta importancia política, social, cultural y económica, seya oxetu de minidebates intermitentes qu’enxamás algamen una solución política final, que resulte favoreceora pa los intereses públicos asturianos. Nin, por supuesto, de pautos tácitos ente gobiernos cómplices cola Ilesia católica.
Poro, Andecha Astur desixe, tanto al Gobiernu asturianu comu al español, una política decidía que dé acabau a la presente situación y proponemos:
- Que los poderes públicos esclarien qu’entrar na reclamación xudicial individualizá de caún de los bienes incautaos pol Vaticanu ye tan imposible ya inabarcable comu impresentable, porque se partiría de reconocer la propiedá eclesiástica.
- Que los poderes públicos asuman la so obligación d’aperiar con urxencia un marcu llexisllativu que permita la espropiación de tolos bienes inmatriculaos pola Ilesia católica, convirtiéndolos darréu en bienes de titularidá pública, ensin que proceda indenización denguna.
- Que l’Estáu español rescinda darréu’l Concordatu col Estáu`l Vaticanu, dando acabu a les rellaciones privilexaes que dende’l reináu d’Isabel II de Borbón (más tardi Franco, Juan Carlos I y Felipe VI) vien prestando l’Estáu español, vía concordatos, a la sociedá d’intereses y negocios privaos que representa la Ilesia católica.
Andecha Astur denuncia la responsabilidá que nesta situación tien el Gobiernu d’Asturies, que primero nun s’opuso al procesu d’inmatriculaciones, que calló demientres se producía, que fizo por desinformar cuandu dempués se conoció, qu’acabó por reconocelu a la fuercia y ensin asumir responsabilidá denguna nel procesu, y que nun amuesa interés dalu por solucionar.
Adrián Barbón, comu Presidente, Berta Piñán, comu Conseyera Cultura, y Rita Camblor, comu Conseyera Presidencia (con competencies en Xusticia), tienen la obligación ética y política de demostrar que’l Gobiernu asturianu nun ye cómpliz activu d’estes apropiaciones indebíes, cometíes pola Ilesia católica. Y tienen la responsabilidá de presentar énte la Xunta Xeneral tanto un llistáu completu y correchu de los bienes inmatriculaos, comu un plan específicu pa la recuperanza de los bienes asturianos que la Ilesia católica incautó. En casu de nun cumplir con estes responsabilidaes, los tres prestaríen un meyor sirviciu a Asturies si abandonaren los sos cargos.
Andecha Astur llama a los partíos con representación na Xunta Xeneral a dexase d’alderiques estéticos y de propuestes redautaes con medies tintes, y a sumase a los tres pidíos, claros y direutos, que güei presentamos al Gobiernu asturianu y al español.
