Homenaxe a la Declaración de Soberanía de 1808

Andecha Astur convoca una concentración el domingu 23 n’Uviéu y propón a la Xunta Xeneral la cellebración istitucional la declaración Soberana del 25 mayu de 1808, considerando que los partíos españoles, que tienen mayoría na Xunta Xeneral, nun puen ñegase a reconocer aquella declaración soberana y a incluyila comu fechu cimeru na recostrución de la Memoria Hestórica d’Asturies.

L’actu políticu ta convocáu pa esti domingu 23, a les 13 hores  a les puertes de la Sala Capitular onde tuvo llugar la Declaración de Soberanía pola Xunta Suprema, na Plaza de la Corrada L’Obispu n’Uviéu, n’homenaxe a esta declaración, y en reivindicación del mesmu drechu del que fixeren usu los nuesos entepasaos: la Soberanía.

Arriendes d’ello, Andecha Astur vien de proponer a la Xunta Xeneral l’aprebación d’un conxuntu iniciatives pa reconocer y cellebrar istitucionalmente que’l 25 mayu de 1808 la Xunta Xeneral exerció una temprana reconocencia política de la soberanía popular de les asturianes y asturianos. Declaróse soberana, formó l’Exércitu Defensivu Asturianu, dotóse d’embaxaores d’Asturies qu’unvió al Reinu Xuníu. Aquella Xunta Xeneral, amás, anició tribunales propios, istitucionalizó la bandera d’Asturies y collaboró col Pueblu Asturianu na defensa’l país astur y na escoyeta’l so futuru.

Son toos ellos unos fechos de tala importancia na hestoria de cualisquier pueblu que los protagonice, que los sos sucesores tienen la obligación hestórica, política y ciudadana de reconocelos y remembralos cola dinidá que representen.

Dalgún añu, ahi tiempu, la Xunta Xeneral aprebó un testu remembrando aquellos fechos, pero féxolo nun tonu menor y falsiando la so sinificación hestórico. Nun ye solución que valga. Señalamos que’l Gobiernu de Barbón, que ye sofitáu istitucionalmente por IU y Podemos, nun debería tener problema dalu p’aprebar la propuesta que presenta Andecha Astur. Poro, la non toma en consideranza de la mesma, sólo podría entendese comu’l determín políticu de tapecer la hestoria d’Asturies y aquellos díes nos que se reconoció que’l Pueblu Asturianu yera soberanu y dueñu’l so destín. Nun reconocer el 25 Mayu de 1808 ye siguir condergando Asturies al sucursalismu, a los malos determinos qu’otros vienen tomando por nós.

Creyemos que, 213 años dempués d’aquel momentu hestóricu, yá ye tiempu de que los partíos españoles dexen de ñegase a incluyir el 25 mayu de 1808 na recostitución que se fae de la Memoria Hestórica d’Asturies, sólo por razones que resulten sectaries pal Pueblu Asturianu.

Les midíes propuestes a la Xunta Xeneral por Andecha Astur son éstes:

• Que la Xunta Xeneral declare’l 25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, remembrando la declaración de la Xunta Xeneral d’Asturies comu entidá soberana d’Asturies en 1808.
• Que’l 25 mayu de ca añu la Xunta Xeneral convoque una sesión estraordinaria del so Plenu, na que se llea un testu de remembranza d’aquella declaración soberana d’Asturies.
• Que’l 25 mayu de ca añu el Plenu de la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía.
• Que’l 25 mayu de ca añu la Sala Capitular de la Catedral d’Uviéu permaneza abierta al públicu pa la so conocencia y reconocimientu.

N’alcordanza de les muyeres y homes que’n 1808 defendieron Asturies y el nuesu drechu a decidir. ¡Puxa Asturies!