Na xornada d’ayeri, Andecha Astur remembró y vindicó la declaración soberana que la Xunta Suprema fexo’l 25 mayu 1808.
Andecha Astur rializó’l so tradicional actu políticu a les puertes de la Sala Capitular onde tuvo llugar la hestorica Declaración de Soberanía, un actu col que vindica non solo esti fechu hestóricu, sinon la so vixencia dafechu, y la necesidá de recuperar esi drechu a la Soberanía del pueblu asturianu col que poder enfrentar el nuesu futuru colleutivu.
Nel actu, onde se fexo una ofrenda floral y s’escenificó la vindicación de la Soberanía, intervino Mariu Arbesú, que remembró la Declaración de Soberanía, la so importancia y trescendencia, describiendo la continuidá que la desixencia d’esti drechu tien na hestoria d’Asturies, con fechos comu l’aniciu de la República Obrera y Campesina d’Asturies en 1934, o la declaración de Soberanía del Conseyu d’Asturies y Llión –Conseyu Soberanu de magar la mesma- en 1937.
Pero sobro too, la intervención de Mariu Arbesú cincó la urxente necesidá n’Asturies d’anguañu de recurrir a la Soberanía pa superar la situación de dependencia que carecemos, con un Estatutu impuestu de Madrid y con un Estáu español que ñega los nuesos drechos como pueblu.
Ello asina, destacó la necesidá de cuntar con esa ferramienta democrática pa poder defendemos frente a les agresiones d’un estáu asimilacionista que ta esfarrapando social, económica y culturalmente a Asturies, y pa guetar soluciones propies, que mos permitan garantizar un futuru dignu p’Asturies y los/es asturianos/es, y cómo esi drechu democráticu aféutamos tantu colleutiva como individualmente “Soberanía ye que decidas la to vida comu presona y comu Pueblu. Soberanía ye futuru.”
Una vuelta finada la intervención política, y tres la interpretación de la Flor del Agua, l’actu continuó na propia Xunta Xeneral, a cuyes puertes dexáronse prendíes les lletres que recuerden y reclamen esa soberanía que tanta falta fai al nuesu país.
