Turistes: Asturies nun ta en venta!!

Andecha Astur entama una campaña por un turismu caltenible, respetuosu col mediu ambiente y la identidá asturiana

N’Asturies sofrimos un modelu de turismu masificáu y descontroláu, que vien siendo consentíu y afaláu polos sucesivos gobiernos qu’equí xestionaron los partíos españoles, y agora pol que preside Adrián Barbón, de la FSA-PSOE. Ye un modelu fracasáu, depredaor y que torga’l drechu a un trabayu dinu y al acesu a la vivienda.

La política turística de Barbón fizo qu’Asturies marafundiare bona parte de la imax de “paraísu natural” que viende’l propiu gobiernu. Atascos nos Picos d’Europa, descensos masivos del Sella con canoes, afluyencia descontrolao de xente en villes, pueblos y playes, 3500 visites diaries a los Llagos de Cuadonga, cientos de visitantes nos oservatorios d’osos, llargues fileres d’escursionistes per desfilaeros pelligrosos y con altu valor paisaxísticu, aparcamientos masivos en fasteres paisaxístiques protexíes…

Nel aspeutu económicu esta política permisiva de Barbón non sólo representa pan pa güei y fame pa mañana, sinón qu’amás afala un modelu d’economía tutelá dende l’esterior y costruyía sobro la precariedá llaboral.

Les asturianes y asturianos queremos vivir, trabayar y esfrutar n’Asturies, d’un mou caltenible y equillibráu. Poro, el futuru d’Asturies nun ye convertise nel gran parque temáticu ñatural del Estáu español, porque esti modelu de turismu ye agresivu y tien consecuencies graves pa la vida del Pueblu Asturianu:

• Daña bultablemente la calidá de los sirvicios públicos básicos que les Cases Conceyu ufren a la ciudadanía.
•  Torga’l modelu de convivencia y sostenibilidá que los asturianos quieren pa les sos ciudaes y aldegues.
•  Descontrola dafechu los precios la vivienda, torgando munches vegaes que la mocedá tenga acesu a casa nel so pueblu, pero permitiendo que’l turista sí tenga residencia disponible a preciu descomanáu.
•  Convierte a la hostelería nun falsu motor principal de la economía, cuandu, en rialidá, ye un seutor llaboral qu’ufre cuasi sólo emplegos temporales, d’escasa cualificación, mal retribuyíos y, munches vegaes, sometíos a condiciones d’esplotación, ayenes a la normativa vixente nel seutor.
•  Causa un deterioru evidente del paisax del llugar y representa un fautor de desequillibriu nel caltenimientu’l mediu ambiente.
•  Torga una comunicación viaria eficaz nes fasteres más turístiques, pola concentración descomaná de vehículos privaos.
•  Xenera un mayor riesgu de perda d’identidá p’aquellos países a los que, comu Asturies, se-yos ñeguen polítiques series de recuperanza y afitamientu de la so identidá llingüística, cultural, paisaxística…

Poro, n’Andecha Astur dicimos, a los turistes, empresarios y políticos defensores d’esi modelu, qu’Asturies nun ta en venta. Y que tien de dotase d’un turismu caltenible, respetuosu col mediu ambiente y la identidá asturiana. Pa ello defendemos la tramitación urxente d’una Llei de Turismu Caltenible, que sustituya a la desfasá Llei 7/2001 de Turismu, que firmare Tini Areces hai venti años.

La Llei de Turismu Caltenible que defendemos debería tener, ente otros, los siguientes oxetivos:

• Corresponsabilizar al turista cola prestación de sirvicios que se-y da y col caltenimientu de los bienes ñaturales, hestóricos y culturales de los qu’esfuta.
•  Garantizar un turismu ayenu al modelu de mases, respetuosu y compatible col caltenimientu’l del mediu ambiente, les actividaes tradicionales de produción y la identidá d’Asturies, asina comu colos usos y costumes de les asturianes y asturianos, que tenemos drechu a vivir, trabayar y esfrutar nel nuesu país.
•  Afuxir de la cantidá pa facer atrayible la calidá.
•  Nun multiplicar el riesgu sanitariu de la población.
•  Asegurar que les empreses d’hostelería y hotelería contraten trabayaores respetando íntegramente la llexislación llaboral vixente, torgando la esplotación llaboral y la precariedá y guetando un emplegu de calidá nel seutor.
• Dotar l’alministración pública de direutrices ñidies pal control ya ispeición de les empreses del seutor, cuntando pa ello con recursos homanos y materiales suficientes.
• Regular un impuestu del turismu caltenible, o ecotasa, d’aplicación nes estancies turístiques y col oxetivu d’atender con él los gastos públicos que xenera l’actividá d’esti seutor; una ecotasa que repercuta nes arques públiques del gobiernu asturianu y de los conceyos d’Asturies, comu se fae yá en munchos países europeos y en dellos territorios nel Estáu español.
• Dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxético.
• Evitar la contaminación por residuos y la degradación paixaxística.
•  Controlar tanto los alquileres illegales comu’l fraude fiscal nel seutor.
•  Asegurar que l’actividá turística nun mengua les posibilidaes de los asturianos d’algamar viviendes n’arriendu o propiedá en toles fasteres d’Asturies y en condiciones económiques afayaíces, controlando especialmente la densidá de pisos turísticos nos barrios y afitando llímites nel preciu los arriendos.
• Xuncir les polítiques rellacionaes col turismu con aquelles otres qu’afalen el comerciu llocal y el consumu de productos asturianos.
•  Afalar na actividá turística midíes pa la conocencia de la llingua, la cultura y la hestoria d’Asturies.
•  Concentrar les aídes al seutor turísticu nes pequeñes y medianes empreses, en cuenta financiar les grandes corporaciones.

Una Llei de Turismu Caltenible ye güei un oxetivu social y políticu tan necesariu comu asumíu pola ciudadanía. Si nun se llogra pronto, el PSOE y les fuercies que lu curien nel gobiernu tendrán munches coses que xustificar públicamente, si puen.