EH Bildu siguirá defendiendo les iniciatives d’Andecha Astur nel Congresu español y nel Parllamentu Européu, tando prósima la visita de trabayu d’Andecha Astur a dambos
Esta fin de selmana Carme Pérez y Mariano Suárez, de la Xunta Executiva d’Andecha Astur, aconceyaron en Bilbo con Igor Zulaika, axuntu al Direutor de Rellaciones y Política Internacional d’Euskal Herria Bildu. Ye una de les xuntes de coordinación que caltenemos colos miembros de la coallición Agora Repúbliques, na que, en compaña de partíos soberanistes de tol Estáu, se presentó Andecha Astur a les caberes elleiciones europees y españoles.
Andecha Astur y EH Bildu compartieron reflexones sobro la situación política d’anguañu n’Asturies y Euskadi, asina comu la del Estáu, afitándose na necesidá de siguir costruyendo consensos sociales y políticos que favorezan la reconocencia de Repúbliques populares nes estremaes naciones qu’anguañu hai nel Estáu español.
Tratáronse tamién aspeutos internos importantes sobro la coallición, al empar qu’EH Bildu tornó amosar el so compromisu pa, en nome d’Andecha Astur, siguir defendiendo intereses d’Asturies y la so clas trabayaora nel Congresu español y nel Parllamentu Européu. De fechu dambes organizaciones entamarán pronto a preparar un alcuentru en Madrid y otru en Bruxelles, pal empiezu del prósimu cursu políticu, si la situación sanitario d’entós nun pon torgues. Tamién s’estudiaron calces de collaboración pa que les propuestes d’Andecha Astur tean presentes na Conferencia sol Futuru d’Europa, na que participa l’eurodiputáu Pernando Barrena, miembru d’EH Bildu, representante de la coallición Agora Repúbliques y davezu voceru de les propuestes y denuncies d’Andecha Astur énte la Xunión Europea.
A lo cabero, algamóse tamién un alcuerdu de collaboración pa unes xornaes polítiques que va entamar n’Asturies Andecha Astur, nes que partiparán dalgunos responsables d’EH Bildu, y representantes d’otros pueblos que lluchen pola so soberanía.
La collaboración de clas ente Pueblos da frutos prestosos, comu se pue ver. Aprofitamos el momentu pa, una vegá más, convitar a la militancia d’Andecha Astur a participar activamente nes estremaes xeres que ñacen de la nuesa pertenencia a la coalición Agora Repúbliques. Comu siempres, la nuesa militancia tendrá más información pelos calces internos avezaos y dirixéndose a andechainfo@gmail.com
