Esta Llei de Turismu Caltenible foi presentada pa la so aprobación ente la Xunta Xeneral, y marca la fin de campaña añal d’Andecha Astur defendiendo un turismu caltenible, respetuosu col mediu ambiente y la identidá asturiana
Nel documentu presentáu ent e la Presidencia de la Xunta Xeneral recuéyese comu «numberosos, llamativos y vergoñosos casos asocedíos esti branu en materia turística permítenmos comprebar que sofrimos un modelu de turismu masificáu y descontroláu, qu’afeuta bultablemente a los sirvicios públicos básicos que les Cases Conceyu ufren a la ciudadanía, a la calidá de vida y al modelu de convivencia y sostenibilidá que les asturianes y asturianos deseyamos pal nuesu país»; esponiéndose que la Llei 7/2001, de 22 de xunu, de Turismu tien más de venti años d’antigüedá y nun ye una ferramienta valible pa encadarmar un modelu de turismu caltenible, comu ye mester.
Ello asina, Andecha Astur presenta una propuesta de Llei de Turismu Caltenible n’Asturies, qu’inclúi l’aplicación d’una ecotasa y la definición d’un nueu modelu turísticu, que permitiría meyorar enforma les condiciones de vida de los habitantes de los conceyos más afeutaos pola actividá turística y, en xeneral, de toa Asturies.
Arriendes d’ello, nesta Llei propónse la inclusión d’una nuea norma que debería incluyir:
- -a regulación d’un impuestu del turismu caltenible, o ecotasa, que s’aplique nes estancies turístiques p’atender con él los gastos públicos que xenera l’actividá d’esti seutor y que repercuta nes arques públiques del gobiernu asturianu y de los conceyos d’Asturies, comu se fae yá en munchos países europeos y en dellos territorios nel Estáu español.
- El compromisu de dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxética.
Y que debería tener, ente otros, los siguientes oxetivos:
- Evitar el turismu de mases, regulando un modelu turísticu compatible cola proteición del mediuambiente y respetuosu col modelu cultural asturianu y les formes tradicionales de vida y produción.
- Evitar la contaminación por residuos y la degradación paixaxística.
- Controlar tanto los alquileres illegales comu’l fraude fiscal nel seutor.
- Garantizar los dechos llaborales de los y les trabayaores del seutor, guetando un emplegu de calidá, torgando l’emplegu precariu, penalizando les xornaes llaborales irregulares y el cobru non regularizáu.
- Dotar l’alministración pública de direutrices ñidies pal control ya ispeición de les empreses del seutor, cuntanto pa ello con recursos homanos y materiales suficientes.
- Asegurar que l’actividá turística nun mengua les posibilidaes de los asturianos d’algamar viviendes n’arriendu o propiedá en toles fasteres d’Asturies y en condiciones económiques afayaíces, controlando especialmente la densidá de pisos turísticos nos barrios y afitando llímites nel preciu los arriendos.
- Protexer los espacios ñaturales de la masificación y de la invasión con vehículos.
- Facilitar nes fasteres turístiques un tráficu de vehículos fluyíu y seguru, asina comu alternatives qu’igüen los severos problemes d’aparcamientu, puxando, en tou casu, pol tresporte públicu énte’l particular.
- Empareyar les polítiques rellacionaes col turismu con aquelles otres qu’afalen el comerciu llocal y el consumu de productos asturianos.
- Promover na actividá turística midíes pa la conocencia de la llingua y cultura d’Asturies.
- Concentrar les aídes al seutor turísticu nes pequeñes y medianes empreses, en cuenta financiar les grandes corporaciones.
