Andecha Astur sofita la recoyía de firmes entamada por FAMYR denunciando l’Estatutu impuestu a Asturies dende Madrid, que camuda’l nome d’Asturies pol de “Principado”
La Federación Asturiana Memoria y República .FAMYR- entamó en change.org una recoyía de firmes desixendo que na reforma del Estatutu s’esanicie la denominación de “Principado” en referencia a la nuesa nación.
“En Asturies carecemos por partía doble la Monarquía istaurada por Franco. Per un llau, la de formar parte d’un estáu cuya xefatura naide nun ellixó, y per otru llau, la denominación de Principado”
La propuesta reclama “La tradición de llucha por valores democráticos na nuesa tierra ye una seña d’identidá, dende aquel 25 Mayu de 1808, en que se declaro per primer vegada la soberanía popular na nuesa tierra, como afirmación d’independencia frente al invasor” y afirma que “la denominación impuesta de “Principado” costitúi una afreta al calter rabalbu de la nuesa comunida. Y lo ye más anguañu cuandu la Monarquía impuesa por Franco, que tien en Felipe VI el so continuador, demostróse una fonte de corrución y d’espoliu de la riqueza de la mayoría social que trabaya díi ente díi, pa que cuatro families sigan viviendo a cuerpu rei”
Ello asina, Andecha Astur fai un llamamientu a participar nesta campaña de firmes, y a siguir denunciando la situación predemocrática que se vive n’Asturies, una nación con un Estatutu impuestu dende Madrid, qu’ensiquier nun reconoz drechos humanos tan básicos como la oficialidá de la nuesa llingua nacional.
https://www.change.org/p/adri%C3%A1n-barb%C3%B3n-que-la-comunidad-aut%C3%B3noma-de-asturias-deje-de-ser-un-principado/c
