Barbón y les Cases Conceyu dében-yos la remunicipalización de los sirvicios d’aída a domiciliu
Andecha Astur tuvo coles trabayaores del SAD Asturies na concentración d’esti martes énte la sede d’UXT. Ellí esti sindicatu y CCOO facíen una asamblea sólo pa los afiliaos, dientru les sos maniobres pa desestabilizar el poder asambleariu del SAD, que convocó una fuelga indefinía y lleva nella cuasi un mes.
Énte l’acosu que carez el coleutivu per parte la patronal y los sindicatos españoles, Andecha Astur quinxo facer del so alcuentru col SAD una oportunidá pa esparder les sos vindicaciones, tan normales y tan xustes.
Elena Gago, representante del sindicatu Coleutivu Trabayaores (CT), fálamos precisamente del papel llamentable que tán xugando nesti conflictu los dos sindicatos españoles. Básicamente CCOO y UXT intenten consiguir ciertes meyores pa la so afiliación, consiguiendo qu’ésta llueu se desvincule de les vindicaciones de tol colleutivu. A lo cabero foncionen comu disolvente del movimientu asambleariu, favoreciendo a la patronal y usando pa ello les trapaceríes y bilordios propies de mafies, non de sindicatos democráticos.
Arancha Suárez, del sindicatu Coleutivu Trabayaores (CT), fala de les vindicaciones que les trabayaores del SAD defenden nesta fuelga indefinía.
Y Eva, una trabayaora del SAD, cúntamos cómu’l llabor que desendolquen ye un sirviciu de titularidá pública, pero que ta esternalizáu en manes d’empreses privaes que se llimiten a esplotar a les trabayaores na precariedá y apropiase de los beneficios.
Una representación d’Andecha Astur, con Diego Morís, responsable de la so Estaya Llaboral, acompangó nesta movilización a les trabayaores del SAD, espresándo-yos el sofitu a la so plataforma vindicativa. Igual que defendemos el modelu asambleariu, solidariu, tresparente y ayenu al sindicalismu de moqueta que prautiquen les trabayaores del SAD.
Na semeya, Elena Gago (representante del Coleutivu Trabayaores) y Diego Morís (Estaya Llaboral d’Andecha Astur).
