Propuesta de Turismu Caltenible

Andecha Astur presenta una propuesta pa un Turismu Caltenible, qu’inclúi la regulación d’una Ecotasa y la definición d¡un nueu modelu turísticu

Ca vegá se conocen más protestes de Cases Conceyu que recueyen el maltar de la vecindá col turismu d’anguañu. Y ca vegá la esquierda española tien menos marxe pa disimular qu’esti modelu turísticu ye un problema p’Asturies.

Poro, Andecha Astur torna presentar nes Cases Conceyu la so propuesta pa una Llei de Turismu Caltenible. Ye’l momentu en que los partíos que gobiernen los conceyos y los partíos que dicen defender una esquierda más allá del PSOE puen aprofitar p’aperiar una solución p’Asturies. Aprebar ente toos una llei que regule un nueu modelu turísticu sedría una bona forma de trabayar xuntos pol futuru d’Asturies.

La Llei d’Areces: venti años de ruina

Nos tiempos más corrutos d’Asturies, el PSOE d’Areces llantómos (2001), colos sos únicos votos, la Llei de Turismu que lleva en vigor dende entós. El PSOE, enfotáu sólo en facer caxa y non nel futuru d’Asturies, apostó pol turismu de mases énte’l turismu de calidá, renunció entós a la ecotasa turística, ñegóse a considerar la prioridá del turismu cultural, rióse de la necesidá d’un turismu respetuosu cola identidá y les tradiciones d’Asturies, inoró la figura de los guíes rurales llocales, punxo abondes torgues a la declaración de “fastera turística saturá”, etc.

Más de venti años con una llei enquivocá y ruina. Una llei que dende una imax d’Asturies comu “paraísu” onde too val, allimentando un modelu turísticu masificáu, descontroláu, estacionalizáu. Esti modelu sólo xenera beneficios inmediatos a les grandes empreses turístiques y al pior de los modelos d’hostelería, porque, per otru llau, daña bultablemente los sirvicios públicos básicos que les Cases Conceyu ufren a la ciudadanía, la calidá de vida, el modelu convivencia, la sostenibilidá y el respetu a la nuesa identidá que les asturianes y asturianos deseyamos pal nuesu país.

Una oposición ensin alternatives

Nestos venti años ¿qué ufrieron los partíos de la oposición? Podemos sólo pidió un camudu na llei: regular la figura’l guía rural llocal y fízolo en 2016. Izquierda Unida enquivócase agora al pidir una ecotasa parcial, ensin poner enriba la mesa un modelu turísticu estremáu. El PP esgañítase na defensa’l turismu mases que beneficia a les grandes empreses. Foro y Ciudadanos nun gutien. Y Vox góñase del respetu a la identidá asturiana, mentantu sólo fae propuestes pal turismu español.

Barbón, prometiendo y engañando

¿Y el PSOE? Pos el PSOE d’Adrián Barbón entá tuvo la desfachatez de presentase a les caberes elleiciones asturianes col programa entituláu “400 midíes pa la meyor Asturies”. Mui pocos d’esos compromisos elleutorales se referíen al turismu, pero esti Gobiernu d’Adrián Barbón incumplió la mayoría y los más importantes: revisión de la Llei de Turismu, entamu d’un sirviciu d’anovación turístico, aprebación una Llei Integral de Presones mayores que recueya los sos drechos y necesidaes en materia d’arruelu y turismu, etc.

Comprometíos con Asturies: la nuesa Llei de Turismu Caltenible

Sólo’l nacionalismu asturianu d’esquierdes, sólo Andecha Astur, lleva años dando la importancia que tien al turismu, pa que dexe de ser ún de los problemes d’Asturies y se convierta nesa fonte de trabayu dignu y arguyu xustificáu que pue ser.

L’alternativa que defendemos sofítase nuna nuea llexisllación, una Llei de Turismu Caltenible n’Asturies, qu’inclúi l’aplicación d’una ecotasa y la definición d’un nueu modelu turísticu, que permitiría meyorar enforma les condiciones de vida de los habitantes de los conceyos más afeutaos pola actividá turística y, en xeneral, de toa Asturies, respetando al tiempu la nuesa identidá.

Darréu pues consultar la propuesta d’Andecha Astur.

PROPUESTA DE LLEI DE TURIMU CALTENIBLE N’ASTURIES, QU’INCLÚI LA REGULACIÓN D’UNA ECOTASA Y LA DEFINICIÓN D’UN NUEU MODELU TURÍSTICU

La presencia de turistes n’Asturies demientres los branos de los caberos años, prevoca masificación y consecuencies desestabilizaores graves en materia de respetu a los usos y costumes de la población llocal, de disposición y calidá suficiente de los sirvicios municipales básicos, de calidá de vida de la población asturiano, de precariedá llaboral, d’equillibriu mediuambiental, de caltenimientu los recursos ñaturales de los conceyos, etc. Too ello fae mester qu’Asturies cunte con un nueu marcu normativu en materia de regulación turístico.

Les asturianes y asturianos queremos vivir, trabayar y esfrutar n’Asturies d’un mou caltenible y equillibráu. De forma que’l futuru los nuesos conceyos y d’Asturies toa nun pasa por un modelu d’esplotación turístico que mos condergue a ser un gran parque temáticu ñatural. Necesitamos poder vivir nos nuesos conceyos acordies los nueses posibilidaes, recursos y deseyos; pa ello necesitamos qu’Asturies desendolque un modelu de turismu caltenible, de calidá, complementariu col nuesu mou de vida y col restu les actividaes económiques, non masificáu, con condiciones sociosanitaries segures, y tamién respeutosu cola ñatura, la cultura y la identidá asturiana.

La norma superior de regulación de l’actividá turística n’Asturies ye la Llei 7/2001, de 22 de xunu, de Turismu (BOPA núm. 156, de 6 de xunetu de 2001; BOE núm. 203, de 24 d’agostu de 2001; con cabera actualización del 25 d’avientu de 2010). Ventidós años dempués de la so redaición, la rialidá del seutor evolucionó de manera tala que la llei convirtióse nun preséu poco útil en munchos aspeutos y les circustancies d’anguañu desixen una actualización afayaíza del testu.

Poro, convién a la ciudadanía asturiana que’l Gobiernu asturianu asuma la importancia d’una reforma urxente de la Llei 7/2001, de 22 de xunu, de Turismu.

L’actualización que resulta necesaria entama pol conceutu mesmu del turismu que deseyamos p’Asturies, y que debería espeyase yá nel títulu de la nuea norma: Llei del Turismu Caltenible.

Una nuea norma que debería incluyir:

• La regulación d’un impuestu del turismu caltenible, o ecotasa, que s’aplique nes estancies turístiques p’atender con él los gastos públicos que xenera l’actividá d’esti seutor y que repercuta nes arques públiques del gobiernu asturianu y de los conceyos d’Asturies, comu se fae yá en munchos países europeos y en dellos territorios nel Estáu español.
• El compromisu de dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxética.

Y que debería tener, ente otros, los siguientes oxetivos:

• Evitar el turismu de mases, regulando un modelu turísticu compatible cola proteición del mediu ambiente y respetuosu col modelu cultural asturianu y les formes tradicionales de vida y produción.
• Reconocer preseos llegales pa la preservación del hábitat, incluyendo la figura de “fastera turística saturá”.
• Evitar la contaminación por residuos y la degradación paixaxística.
• Controlar tanto los alquileres turísticos illegales comu’l fraude fiscal nel seutor.
• Garantizar los dechos llaborales de los y les trabayaores del seutor, guetando un emplegu de calidá, torgando l’emplegu precariu, penalizando les xornaes llaborales irregulares y el cobru non regularizáu.
• Dotar l’alministración pública de direutrices ñidies pal control ya ispeición de les empreses del seutor, cuntanto pa ello con recursos homanos y materiales suficientes.
• Asegurar que l’actividá turística nun mengua les posibilidaes de los asturianos y asturianes d’algamar viviendes n’arriendu o propiedá en toles fasteres d’Asturies y en condiciones económiques afayaíces, controlando especialmente la densidá de pisos turísticos nos barrios y afitando llímites nel preciu los arriendos.
• Protexer los espacios ñaturales de la masificación y de la invasión con vehículos.
• Facilitar nes fasteres turístiques un tráficu de vehículos fluyíu y seguru, asina comu alternatives qu’igüen los severos problemes d’aparcamientu, puxando, en tou casu, pol tresporte públicu énte’l particular.
• Regular la figura del guía rural llocal y sofitar les iniciatives llocales que vinculen la conocencia’l mediu, la so interpretación cultural, hestórica y paisaxística, asina comu la promoción y el sofitu al consumu de productos autóctonos.
• Empareyar les polítiques rellacionaes col turismu con aquelles otres qu’afalen el comerciu llocal y el consumu de productos asturianos.
• Promover na actividá turística midíes pa la conocencia de la llingua, la cultura y la hestoria d’Asturies.
• Concentrar les aídes al seutor turísticu nes pequeñes y medianes empreses, en cuenta financiar les grandes corporaciones.