Andecha Astur denuncia nuevos retrocesos en drechos llingüísticos, esta vegada nel enseñu

El desaniciu del programa d’usu vehicular del asturianu nel enseñu ye un pasu más na política d’esafarrapamientu llingüísticu del que se diz «el gobiernu más favoratible al asturianu de la hestoria»

La conseyera d’Educación d’Asturies, Lydia Espina, vien d’afirmar na Xunta Xeneral que’l Gobiernu nun va volver a trabayar nel Plan Pilotu Esperimental de Promoción del Usu del Asturianu, pesia los sos bonos resultaos.

Dende Andecha Astur consideramos esta decisión llamentable, pero non sosprendente, ya que s’ensierta na llinia de pallabres güeques a favor del asturianu acompangaes de desidia y desdexamientu nos actos, cuando non, como nesti casu, actos direutamente a la escontra del avance de la llingua nacional. El gobiernu de Barbón dizse el más favoratible al asturianu, pero non solo nun declaró, comu prometiere delles vegaes, la oficialidá, sinón que, a nivel educativu, sigui permitiendo que siga ensin esistir la especialidá docente de profesor d’asturianu, amenorgando amás les hores dedicaes a la asignatura na ESO. Non en baldre l’actual PSOE ye heriederu de quienes con más rixu persiguieron y castigaron a los asturfalantes.

El sistema educativu ye una de les ferramientes básiques pa protexer y normalizar una llingua en peligru de desaniciu. Esti plan en concretu demostró en dellos centros educativos d’Asturies que l’asturianu ye un idioma perfechamente válidu como llingua vehicular del enseñu, teniendo, acordies los responsables de la propia alministración, resultaos positivos en tolos cientros nos que se desendolcó. Non solo se vió que l’usu del asturianu nun suponía dalu perxuiciu pa los escolinos, sinón que se demostró tolo contrario, los resultaos de los escolinos meyoraron y la so autoestima llingüística -y poro, personal- ameyoró bultablemente.

N’Andecha Astur consideramos que non solo esti plan tien de tener continuidá, sinón que se tien d’ampliar a más asignatures y, sobre tou, a más colexos, pasando de ser un plan pilotu a ún real, permitiendo a los escolinos de toa Asturies averase al conocimientu na so propia llingua.

Per otru llau, escusase en que nun ye “»xurídicamente posible continuar con ello» al nun haber oficialidá resulta d’una hipocresía inxustificable, siendo como son ellos los responsables de la falta del estatus d’oficialidá pa la nuesa llingua nacional.