Pide a Barbón qu’abandone’l cinismu d’ufrir Asturies comu refuxu pa sanitarios maltrataos cuandu’l SESPA prevoca conflictos llaborales continuaos
Los asesores elleutorales de Barbón acaben de prevocar un grave acidente na precampaña presonal que lleva alantre’l presidente. El socedíu consistió en convencelu pa salir públicamente ufriendo Asturies comu refuxu pa sanitarios maltrataos n’otros territorios.
El presidente tendría de renunciar a actuaciones cíniques comu la que señalamos, cuandu’l SESPA ye ún de los sistemes sanitarios con más denuncies y convulsiones llaborales de tol Estáu.
Les desesperantes llistes d’espera, la permanencia de la teleatención, la falta profesionales de la melecina y la enfermería, la migración por falta d’atención sanitario ente los conceyos asturianos, los recortes horarios n’atención pública o el pieslle de centros, la vixencia d’horarios llaborales escesivos y los problemes colos turnos del presonal sanitariu, la ineficacia de los xestores del Hospital de Cabueñes y del HUCA, la privatización de prestaciones y sirvicios, l’autorización de la llegá de la corporación sanitaria Quirón…
Un analís posáu de cuála ye la situación de la sanidá pública que mos ufre’l Gobiernu’l PSOE demuestra que nun ye bastante abandonar el cinismu y los intereses elleutorales. La situación de crisis y conflictu ye de tala gravedá que resulta imprescindible abrir yá una mesa negociación sanitaria, na que se puea dialogar sobro los aspeutos denunciaos y mal xestionaos, y sobro les alternatives, que sí esisten, p’aperiar un sistema sanitariu públicu de calidá pa toes.
De xuru que los profesionales de la sanidá, les asociaciones de pacientes, los sindicatos y les organizaciones polítiques qu’apostamos pola Sanidá Pública Asturiana podríamos facer llegar a esa mesa munches propuestes que meyoraríen la situación d’anguañu.
