Fasta la ellaboración n’Asturies d’un Plan Estratéxicu de Recursos Enerxéticos
Andecha Astur creye que la política del Gobiernu de Barbón en materia d’enerxía nun tien sentíu dengún, pos vien aprebando planes d’istalación de parques eólicos, especialmente, ensin planificación dala y ensin una valoración suficiente de los daños medioambientales y sociales que causen.
Nestos momentos en que’l Gobiernu del PSOE camienta autorizar molinos eólicos de más de 200 metros d’altor, mesmamente nel centru y na costa asturiana, xunimos la nuesa denuncia a la de los vecinos. Lo mesmo que lo fexemos cuandu s’entamó a semar de molinos l’ocidente y surocidente del país.
Y dicimos con claridá que nos pasos que ta dando Barbón pa suavizar les normes que rixen la istalación d’eólicos nun vemos el respetu medioambiental qu’Asuries merez. Pero sí paez vese un entramáu d’intereses sospechosos entre les grandes corporaciones del seutor y dalgunes estayes del gobiernu de Barbón.
A la vista d’ello, Andecha Astur propón al Gobiernu d’Asturies que priorice la ellaboración d’un Plan Estratéxicu de Recursos Enerxéticos, un Plan de Planificación del Territoriu y un Plan d’Ordenación d’Espacios Marítimos. Y que, mentantu estos planes nun tean aprebaos y nun conozamos con detalle los recursos, necesidaes y previsiones de consumu d’enerxía n’Asturies, asina comu la ordenación territorial y marítima, que s’aprebe y mantenga vixente una Llei de Moratoria de la Enerxía Eólica, Eólica Marina y Fotovoltaica.
En tou casu, defendemos que la normativa d’esplotación enerxética que se defina respete estos cuatru criterios:
- Enantes d’autorizar la esplotación de cualisquier tipu d’enerxía l’Alministración tien de regular suficientemente una planificación ordená d’esa esplotación y la seguridá xurídica de la mesma.
- Cualisquier tipu d’enerxía al que se recurra tien de ser compatible cola proteición del mediu ambiente, incluyendo’l caltenimientu del paisax tradicional, biesques y montes, asina comu compatible coles actividaes del seutor primariu (agricultura, ganadería, pesca).
- En dengún casu nun se podrán facer istalaciones d’esplotación enerxética n’espacios ñaturales con dalgún tipu de proteición paisaxística: Reserves de la Biosfera, Rede Ecolóxica Europea Natura 2000, Parques Nacionales, Parques Ñaturales d’Asturies, Reserves Ñaturales, Rede de Paisaxes Ñaturales Protexíos d’Asturies, Monumentos Ñaturales, Zones d’Especial Proteición pa les Aves…
- En dengún casu nun se podrán facer istalaciones d’esplotación enerxética n’espacios que tuvieren protexíos por interés padremuñal o arqueolóxicu: Bienes d’Interés Cultural, Inventariu del Padremuñu Cultural d’Asturies, Monumentos, Conxuntos Hestóricos, yacimientos arqueolóxicos…
La claridá llexisllativa y la moratoria que pidimos nun son vindicaciones gratuites: Estes enerxíes carauterícense toes elles por necesitar invadir notablemente’l territoriu, ocupando grandes superficies. Poro, presenten graves consecuencies de degradacion ambiental y social del territoriu ocupáu, camudando dafechu’l paisax tradicional y la organización y forma de vida de los habitantes.
Amás, el Gobiernu debiere tener en cuenta que nestos momentos dalgunos espertos yá alerten de la esistencia de munchos más proyeutos eólicos y fotovoltáicos en tramitación que los necesarios pa cumplir los oxetivos marcaos nel Plan Estatal Integráu d’Enerxía y Clima pa 2030.
