Andecha Astur pide a Barbón que solicite la derogación del Rial Decretu eólicu y formalice un conflictu competencial col Estáu
Con rellación al conflictu eólicu, agraváu pol Estáu español pola recién aprebación de molinos eólicos marinos, Andecha Astur acaba presentar al Presidente’l Gobiernu d’Asturies un escritu con tres pidíos:
- Que solicite al Gobiernu español la derogación del Rial Decretu 150/2023, de 28 de febreru (aprebación de planes d’ordenación del espaciu marítimu), que permite la istalación de molinos eólicos en zones marítimes que tán dientru o apegaes a reserves de biodiversidá marina.
- Que, si nun se deroga esi Rial Decretu, Asturies denuncie un conflictu competencial col Estáu español, porque esi testu supón invadir competencies esclusives que mos reserva l’Estatutu d’Autonomía’n materia d’ecosistemes, istalaciones enerxétiques y ordenación del seutor pesqueru.
- Que’l Gobiernu d’Asturies declare la moratoria na esplotación de la enerxía eólica terretre, eólica marítima y fotovoltaica.
Andecha Astur plantega a Adrián Barbón la necesidá de caltener vixente la moratoria eólica, mentantu nun de sean estes condiciones:
- Qu’Asturies defina un marcu normativu que, ensin concesiones a los intereses del oligopoliu enerxéticu, asegure’l caltenimientu de los escosistemes y la biodiversidá, la proteición del paisax, del padremuñu hestóricu, cultural y arqueolóxicu, de les actividaes del seutor primariu y, en xeneral, del mou de vida de l’Asturies rural.
- Qu’Asturies se dote d’un Plan Estratéxicu de Recursos y Necesidaes Enerxétiques, que determine recursos, necesidaes y la combinación de formes de produción enerxética que mos convién.
En tou casu, si foren necesaries les istalacione d’enerxía eólica, debería abrise un debate social y negociar l’apertura de fasteres eóliques marítimes col seutor pesqueru. Por supuestu, cualisquier posible fastera eólica marítica debería tar alloñá de reserves pal caltenimientu la biodiversidá marina.
3 thoughts on “Moratoria eólica y conflictu competencial col Estáu”