Prevaricación y malversación son los posibles delitos denunciaos por reducir al mínimu l’actividá de los Centros Propios de Formación pal Emplegu y d’entregar esta actividá a sindicatos, patronales y academies privaes, pa que se llucren
Andecha Astur acaba de denunciar énte la Fiscalía Superior d’Asturies al Conseyeru d’Industria, Emplegu y Promoción Económica, Enrique Fernández Rodríguez, y a la Direutora-Xerente del Servicio Público de Empleo (SEPEPA), por un supuestu delitu de prevaricación y otru de malversación.
Una alministración desleal, intencioná y dolosa de los Centros Propios de Formación pal Emplegu, dependientes del SEPEPA, permitiría falar d’estos dos delitos, porque dambes autoridaes públiques son responsables de reducir a la mínima espresión les plantíes, recursos y ufiertes formatives d’esos Centros, destinaos a la insersión de mocedá nel mercáu llaboral y a la reinserción de paraos mediante la formación en nuees especialidaes llaborales. Al mesmu tiempu, esa alministración desleal, que recorta prestaciones de formación pública y gratuita básiques anguañu, ta permitiendo que se llucren sindicatos, patronales y academies privaes, que s’ocupen de cobrar fasta 2500 € por impartir formaciones que los Centros del SEPEPA deberíen tar atendiendo gratuitamente.
El SEPEPA creóse en 2005 pa contribuyir al plenu emplegu y reducir el desemplegu. Asina tien Centros Propios de Formación pal Emplegu (Uviéu, Xixón, Llangréu y Avilés) encargaos d’impartir formación llaboral que permita la inserción de la mocedá y la reinserción de paraos nel mercau llaboral, alquiriendo nuees capacidaes profesionales.
Nos caberos años, de forma intencioná y progresible, estos Centros foron perdiendo la capacidá pa cumplir afayaízamente les sos fonciones y d’ufrir la cantidá de formación llaboral, público y gratuito, necesario.
Los mecanismos a los que, nestos caberos años, recurrieron el Conseyeru d’Industria y la Direutora del SEPEPA pa conducir los sos Centros a una situación d’actividá residual foron varios:
- El SEPEPA ñégase a cubrir les vacantes del profesoráu que se xubila nestos Centros.
- Dende la creación de los Centros Propios del SEPEPA fasta anguañu, el SEPEPA amortizó tolos puestos de los funcionarios que se foron xubilando. Agora mesmo nun tien presonal foncionariu estable.
- También intentó acabar col presonal llaboral que teníen, ñegándo-yos la renovación de contratos. Los trabayaores ganaron nos tribunales la so condición de presonal llaboral indefiníu non fixu. Pero’l SEPEPA tamién va amortizando los sos puestos según se van xubilando.
- El SEPEPA cuasi sólo tien agora presonal autónomu, que nun tien vinculación permanente con estos Centros, trabayando en condiciones de precariedá, mala retribución y males condiciones llaborales, condicionando asina la calidá del sirviciu públicu qu’ufren estos Centros formativos.
- El SEPEPA tiense ñegao en varies ocasiones a facilitar a los Centros los materiales necesarios pa impartir formación, faciendo imposibles dalgunos cursos.
- El SEPEPA torga’l foncionamientu tamién peles tardes de la mayor parte los Centros, ñegándose a cubrir les places de los ordenances de tardi que se xubilaron.
- El SEPEPA recortó brutalmente’l númeru de places formatives ufiertaes.
- El SEPEPA retrasa ente 6 meses y un añu’l pagu beques que resulten imprescidibles pa munchos estudiantes.
Especialmente grave ye la dexación de fonciones que s’impón a los Centros Propios de Fomación pal Emplegu en materia d’impartición de formación pa titular colos Certificaos de Profesionalidá, que resulten fundamentales pa multiplicar les ociones d’acesu al mercáu llaboral porque te reconocen nuees cualificaciones profesionales.
L’alumnáu que necesita Certificaos de Profesionalidá nuna especialidá llaboral concreta que’l SEPEPA podría ufrir y nun quier, vese obligáu a acudir a la formación privá, de la que s’encarguen sindicatos, organizaciones d’empresarios y academies privaes. Si l’alumnu consigue una plaza de les que sovenciona’l SEPEPA nesos centros privaos, estes empreses llúcrense col dineru que-yos da’l SEPEPA y a cuenta de cursos que se ñega dar el propiu SEPEPA. Y si l’alumnu nun consigue una plaza sovencioná, tien de pagar 2500 € al centru priváu, colo que nesti casu llúcrense de los propios mozos y paraos que puxen por formase pa entrar nel mercáu llaboral.
Mentantu, Asturies llidera la tasa estatal de paraos de llarga duración: un 35%. Amás, Asturies tien 21.000 paraos de llarga duración mayores de 45 años (1 de ca 3 paraos), resultando enguedeyá la so reinserción llaboral. Y un 25% los asturianos tán en riesgu de probitú. Énte esta sangrante rialidá, ye muncha la mocedá asturiano que se ve forciao a emigrar, sólo pa garantizar el poder desenrollar un proyeutu vital en condiciones de dinidá.
Paraos, precariedá, migración forciao… Too ye igual pal presidente Barbón. Tolo tapa con propaganda, comu la solución máxica de los nómades dixitales, o l’afirmación falsa de qu’él trabayó cuatru años pa qu’Asturies nun fore un parque d’atraciones pa un turismu descomanáu.
Embaxu esi barniz “guai”, la política de puñu fierro de Barbón ye recortar inversiones en sirvicios públicos básicos que’l so Gobiernu ta obligáu a ufrir con niveles óptimos de calidá y universalidá: enseñu, sanidá y tamién…. formación pal emplegu.
Sicasí, nesti caberu aspeutu vemos que la política d’emplegu de Barbón sofítase nel desmantelamientu de los Centros Propios de Formación pal Emplegu, cometiendo mesmamente los sos subordinaos supuestos delitos de prevaricación y malversación, qu’agora la xusticia, tres la denuncia d’Andecha Astur, tendrá d’esclariar.
