Andecha Astur presenta un escritu’n catalán na Xunta Elleutoral d’Asturies, dempués de qu’ésta lu refugó n’asturianu, desixéndolu “n’idioma oficial”
Comu informemos hai poco, les Xuntes Elleutorales d’Asturies, Uviéu y Xixón refugaron un testu n’asturianu d’Andecha Astur, nel que se-yos pidía que garantizaren el drechu a votar n’asturianu, imprimiendo papeletes de votu tamién na llingua’l país, incluyendo la toponimia.
Yá entós la Xunta Elleutoral d’Asturies mos desixía la presentación del escritu “n’idioma oficial”.
Apocayá presentemos a esta Xunta un nueu documentu, pidiendo qu’informen a toles meses elleutorales de que son votos valibles les papeletes n’asturianu que se depositen nes urnes, si los propios partíos les faciliten previu visáu de les Xuntes Elleutorales, comu fae davezu Andecha Astur.
Pos bien, la Xunta Elleutoral d’Asturies refugó ayeri esti nueu escritu, desixendo otra vuelta la so presentación “n’idioma oficial”. Asina, nun sólo reprime l’usu de la llingua d’Asturies, sinón que torga l’exerciciu d’otros drechos democráticos básicos, comu son los elleutorales, tratando a los asturianos comu ciudadanos de segunda categoría.
Pa poner n’evidencia, non sólo la inxusticia, sinón la ridiculez de la represión llingüística que carez Asturies, Andecha Astur presentó esta mañana’l mesmu documentu pero escritu’n catalán.
Andecha Astur agradez la torna al catalán del testu a varios de los sos militantes, “lleendes urbanes”, mozos y moces espatriaos forzosos d’Asturies y agora residentes en Catalunya; pero con un compromisu tan seriu cola so tierra que mesmamente siguen asumiendo tar comu candidatos nes llistes d’Andecha Astur.
La vergoña de que l’Alministración mos refugue escritos n’asturianu, aceutándolos en catalán, euskera o gallego tien culpables claros. Culpables nel Gobiernu del PSOE que preside Adrián Barbón, asina comu nos partíos collaboraores que tien. Culpables nel Gobiernu “progresista” de Madrid, conformáu pol PSOE, IU y Podemos.
En tou casu, pase lo que pase, Andecha Astur comprométese a siguir defendiendo la oficialidá plena de la llingua d’Asturies y los drechos llingüísticos d’esti pueblu, lo mesmo que defende los sos drechos económicos, de xéneru, llaborales, sociales, medioambientales…
