Andecha Astur presenta recursu énte esta situación d’anormalidá democrática
Andecha Astur solicitó, comu’n toles elleiciones, que les Xuntes Elleutorales validaren papeletes d’Andecha Astur n’asturianu, pa repartir a los votantes. La Xunta Elleutoral d’Asturies retrucó darréu validando, comu siempres fexo, les papeletes. Sicasí, les Xuntes Elleutorales de Xixón y Uviéu escoyeron el camín de la represión: a la escontra de lo decidío pola Xunta Elleutoral d’Asturies y de la trayeutoria n’otres elleiciones nes qu’estes mesmes Xuntes sí validaron les papeletes n’asturianu.
Andecha Astur lleva 23 años consiguiendo validar el votu n’asturianu en ca convocatoria elleutoral, yá seya d’ámbetu européu, estatal, asturianu o municipal. Pero esti añu les Xuntes Elleutorales d’Uviéu y Xixón escoyeron nun respetar los drechos elleutorales y llingüísticos de los asturianos, sapozando una trayeutoria de cuasi un cuartu sieglu y dando llugar a una escandalosa, prevocativa y antixurídica disparidá de criteriu cola so Xunta superior, la d’Asturies.
Esta situación preba cómu’l réxime afitáu pol PSOE nel Estáu y nel gobiernu d’Asturies tien a ésta somorguiá nun estáu esceicional d’anormalidá democrática.
Nun ye nin normal nin democrático qu’Andecha Astur se viere obligá a llegar al Tribunal Costitucional, nel 2000, p’algamar una sentencia que punxo n’evidencia al Tribunal Superior de Xusticia d’Asturies y que permite a los partíos políticos presentase n’asturianu a les elleiciones. Nun ye normal que, con esta sentencia y dempués de llevar 23 años validando’l drechu al votu n’asturianu, siempres por pidíu d’Andecha Astur, agora les Xuntes Elleutorales de Xixón y Uviéu pretendan ignorar estos drechos yá reconocíos.
Ye más incomprensible entá cuandu tamos falando d’un drechu parcial, llendáu, porque les papeletes validaes n’asturianu nun ta permitío esponeles nes meses y cabines elleutorales; sólo s’almite que’l partíu les imprima, les pague y les distribuya direutamente a los votantes.
Tamos denunciando un retrocesu de cuasi un cuartu sieglu nel exerciciu de drechos elleutorales y llingüísticos.
Esta anormalidá democrática perxudica a un sólu partíu de tolos que se presenten n’Asturies, a Andecha Astur, porque somos los únicos que caltenemos una coherencia práutica na defensa de la llingua asturiana y los drechos llingüísticos de los asturianos/es.
Como consecuencia d’ello somos la única organización que nun pue dedicar toles sos enerxíes a facer una campaña elleutoral normal, porque se mos ñeguen los escritos presentaos n’asturianu, porque tenemos de pelear pola validación del votu n’asturianu’n ca convocatoria, porque tenemos de gastar tiempu y recursos na defensa llegal d’estos drechos, porque tenemos de gastar tiempu y dineru na edición de papeletes propies nel nuesu idioma, porque se mos recorta inxústamente la cantidá de díes disponibles pal buzonéu papeletes…
Esta anormalidá democrática dexa a Andecha Astur, y con ella a tol elleutoráu asturianu, nuna situación de grave indefensión, porque se tán vulnerando los drechos elleutorales y llingüísticos de les presones y les organizaciones.
Esti casu ye la meyor preba de qu’a la cadarma de poder n’Asturies, desoye les sentencies del Tribunal Costitucional, Estatutos d’Autonomía, Lleis d’Usu… Da-yos igual too. Porque too ye motivu de risión pa quien rixe un estáu esceicional d’anormalidá democrática.
Dende Andecha Astur queremos superar l’estáu d’anormalidá democrática con que se castiga a Asturies, porque persabemos que la única solución valible ye la reconocencia d’una oficialidá plena, con aplicación de tolos drechos llingüísticos que tienen los falantes d’otres llingües del Estáu.
Poro, tamos presentando los recursos llegales que proceden pa defender la continuidá del drechu al votu n’asturianu.
Sicasí, insistimos en que, mentantu siguimos defendiendo con tol puxu los drechos llingüísticos colleutivos, Andecha Astur comprométese a dedicar la mesma gana y enerxía a trabayar pola solución de los conflictos sociales, llaborales, económicos, medioambientales… Porque, contigo, ye posible una Asturies meyor pa toes.
Intervención de los compañeros de 6 de la Suiza, denunciando la represión que tan careciendo, porque la represión y l’anormalidá democrática que vivimos n’Asturies afeuta a toes y en toles situaciones.
