Los casos de la Xata Roxa, y la botella tradicional de sidre preben que’l PSOE abondona lo asturiano, fasta cuandu representa riqueza cultural y económico
Asturies ca vegá tien más problemes cola propiedá o la xestión de marques rellacionaes cola identidá’l país. El Gobiernu de Barbón ye responsable d’ello, por una dexadez políticamente intencioná qu’amuesa cómu, no fondero, prefier que se vaiga sumiendo la identidá asturiana, mentantu los sos responsables de redes y márketing pinten a Barbón comu’l campión de l’asturianía.
Les marques rellacionaes cola hestoria, la cultura, l’arte, la llingua, la identidá asturiana’n xeneral sólo deberíen poder ser rexistraes pol propiu Gobiernu d’Asturies. Ello dotaría esti ámbetu d’una seguranza xurídica y política beneficiosa pal interés común y garantizaría que los beneficios d’imax, sociales, económicos y de toa triba son necesariamente d’usufructu públicu.
Pa ello sólo son necesarios dos requisitos, pero, pa desgracia los asturianos, nun cuntamos con ellos. El primeru consiste’n tener un Gobiernu propiu que nun seya asturianu sólo pela vía’l márketing, sinón pela vía de les sos polítiques efeutives. Nin l’anterior Gobiernu de Barbón, nin el que va entamar agora son d’esa condición.
L’otru requisitu ye que les competencies de rexistru marques pasaren del Estáu al Gobiernu d’Asturies. Nin Madrid nin la FSA-PSOE lo quieren asina, pero ye una braera antigualla qu’esta materia seya competencia estatal y que la so regulación seya la centraliega y poco eficaz Llei 17/2002, de 7 d’avientu, de Marques, xunto col Reglamentu pa la so execución (Real Decretu 687/2002, de 12 de xunetu). Ésti ye otru motivu más pol qu’Asturies necesita superar con urxencia’l marcu estatutariu col que se mos llenden toles posibilidaes d’atender les nueses necesidaes y d’escoyer pa ello’l nuesu propu camín.
Per otru llau, ye de destacar la repercusión direuta que tien el caltenimientu d’estes marques a la hora fixar población nel mediu rural, d’importancia cimera pal futuru d’Asturies, y lo que sigún afirma’l Gobiernu de Barbón, –escontra toa evidencia- ye una de les sos prioridaes.
Dos son agora los casos más evidentes de lo que plantegamos: la Xata Roxa y la botella tradicional de sidre.
Dende que ñació, en 2001, la marca Xata Roxa ta’n manes d’una asociación privá, l’Asociación de criaores de la raza Asturiana de los Valles (Aseava), formá por criaores y un comercial mayorista, pa controlar la garantía d’orixe y afalar la venta carne d’esa raza. Cuandu esta asociación esplotó comercialmente de mou afayaízu la marca, recibiendo pa ello abondes aídes públiques, fízolo beneficiándose d’un padremuñu asturianu, comu ye la raza de la Xata Roxa, l’Asturiana de los Valles. Pero cuandu entamaron a descuriar la marca, abandonando les carniceríes propies, dexando ensin fonciones y ensin sueldu a 26 trabayaores, desatendiendo los intereses de cuasi 500 criaores asociaos… non sólo tán xestionando la ruina d’un importante seutor productivu, sinón que tamién tán arruinando la valiosa imax d’una gran marca asturiana, que, por lóxica, debiere ser propiedá de toos.
Asturies tien otru gran problema con una marca tridimensional: la botella tradicional de sidre (conocía comu modelu “Molde fierru”), que resulta ser propiedá esclusiva d’otra asociación privá: l’Asociación de Sidre Asturiano (ASSA), que preside María Cardín Blanco, dueña del grupu empresarial El Gaiteru. Per un llau, ye d’agradecer que, énte la pasividá indiferente del Gobiernu de Barbón, ASSA defendiere l’asturianidá de la botella de los intereses comerciales d’empreses santanderines; pero tampocu nun ye normal qu’un padremuñu cultural comu’l que representa la botella tradicional de sidre tea en manes d’una empresa privá.
