Andecha Astur entama la Charra alderique “Palestina, el drechu a defendese” con Majeb Dibsi de protagonista
Majed Dibsi Bulbul, xurista y periodista palestín, representante del Frente Popular pa la Lliberación de Palestina (FPLP)* y vicepresidente de la Xunión de Comunidades e Instituciones Palestines n’Europa, defenderá’l drechu a l’autodefensa del pueblu palestín énte los ataques israelies
El vienres 9 de febreru la Escuela de Comerciu de Xixón acoyerá una charra-alderique baxo l’entítulu “Palestina, el drechu a defendese” na que Majed Dibsi Bulbul, xurista y periodista palestín, representante del Frente Popular pa la Lliberación de Palestina (FPLP) y vicepresidente de la Unión de Comunidades e Instituciones Palestines n’Europa, defenderá’l drechu del pueblu palestín a defendese pa recuperar los sos drechos inalienables, reconocios pol drechu internacional. Falamos del drechu a vivir en paz, a tornar a los sos llares y propiedaes, pero tamién a decidir el so futuru, a la llibre determinación, a la independencia y a la soberanía nacionales.
Majed Dibsi Bulbul defenderá esa postura, frente a les llectures simplistes asumies n’Occidente incluso por munchos de los que dicen tar de parte de los palestinos, y que dan a entender que lo que ta pasando en Palestina ye la rempuesta d’Israel a l’acción terrorista de Hamás.
La realidá ye que Palestina vive nun continuu asediu per tierra, mar y aire dende hai más de 18 años y que de magar el 7 d’ochobre asistimos al esterminiu sistemáticu d’un pueblu nun xenocidiu de magnitúes épiques, l’intentu xabaz d’esaniciar a toa una población de la so tierra.
Palestina tien drechu a defendese.
Darréu la intervención, abriráse un alderique nel que Majed Dibsi Bulbul retrucará a toles entrugues de los asistentes.
*El Frente Popular pa la Lliberación de Palestina (FPLP) ye una organización revolucionaria marxista-leninista llaica d’estrema izquierda aniciada en 1967 por George Habash. Ye la segunda organización más grande de la Organización pa la Lliberación de Palestina (OLP), dempués de Fatah.
