El resolvimientu pon n’evidencia les faltes de la Llei de Memoria Hestórica y la permisividá de la fiscalía énte los actos facistes
N’escritu robláu pol Fiscal Xefe de la Área de Xixón -D. Alberto Rodríguez Fernández alcuérdase l’archivu de les dilixencies previes abiertes tres la denuncia de Andecha Astur polos actos facistes que tuvieron llugar el pasáu 28 de xunu, con una concentración nes inmediaciones del monumentu a los mal llamaos ‘Héroes de Simanques’ na que s’interpretó’l ‘Cara al Sol’ y realizáronse saludos fascistes.
N’opinión del fiscal, estos fechos constitúin “l’exerciciu lexítimu del drechu fundamental de la llibertá d’espresión”, amestando, escontra toa llóxica y evidencia, que “dichos actos nun suponen una conducta empobinada escontra la discriminación sectaria frente a un determináu grupu o los sos integrantes”.
Dende Andecha Astur queremos denunciar, una vegada más, el doble raseru emplegáu pola Xusticia española a la de valorar los actos públicos, dándose una estraordinaria permisividá p’aquellos actos d’esaltación facista españolista mentes se xudicialicen y reprimen espresiones públiques del ámbitu de la izquierda. -como exemplu’l recién casu conocíu como’l de les ’6 de la Suiza’- y el soberanismu.
Per otra parte, y una vegada más, queda n’evidencia les múltiples faltes de la Llei de Memoria Hestórica, que dexa que sigan realizándose espresiones d’esaltación de los actos facistes y criminales del franquismu.
